Жыхары Міханавічаў: Асфальт кладуць без папярэджання, аўто гразяцца прыбраць эвакуатарам
Па іх словах, рамонт мусіў скончыцца яшчэ ў пачатку верасня, але нечакана пачаўся ў канцы кастрычніка.
У рэдакцыю «НН» звярнуліся жыхары пасёлка Міханавічы, што ў Мінскім раёне. Па іх словах, на вуліцы Савецкай сёння пачалі класці асфальт, не папярэдзіўшы загадзя жыхароў.
«У пачатку верасня ў нас з’явіліся абвесткі, у якіх нам паведамлялі, што з 5 па 9 верасня будуць рамантаваць дарогу. Ад жыхароў вуліцы патрабавалася на час рамонту прыбраць аўтатранспарт», — расказала адна з жыхарак Міханавічаў.
Але, па яе словах, будаўнічая тэхніка на іх вуліцы з’явілся не ў абвешчаны час, а толькі 20 верасня. «Нічога яны тады толкам не зрабілі. Месцамі параскідалі асфальт і праз некалькі дзён з’ехалі».
У чарговы раз МАЗы з асфальтам з’явіліся на Савецкай 19 кастрычніка. На гэты раз без папярэджання, скардзяцца жыхары вуліцы.
«Натуральна, што ніхто не адганяў з вуліцы аўтамабілі. А цяпер большасць на працы. Гэта прыгарад, многім, каб адагнаць аўто, трэба тэрмінова вяртацца з Мінска на электрычцы. Мне з маленькім дзіцём таксама давялося шукаць вольнае месца па суседніх дварах», — кажа жыхарка Міханавічаў.
Па яе словах, цяпер на іх вуліцы стаіць тэхніка ДРБУ-735. «Нейкі мужчына, магчыма кіраўнік рабочых, перапісвае нумары аўто. Мне наўпрост сказаў: не адгоніце самі — выклічам эвакуатар».
Жыхары вуліцы Савецкай наракаюць, што са скандалам дабіліся рамонту дарогі. А цяпер іх вінавацяць у тым, што яны «хочуць ездзіць па ямах».
Атрымаць каментар у Міханавіцкім сельсавеце, які. па словах жыхароў пасёлка, займаецца арганізацыяй рамонту, пакуль не атрымалася — тэлефоны ўстановы не адказваюць.
Цяпер чытаюць
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?8
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары