Rasijskaja armija stracić 650 tysiač čałaviek zabitymi da kanca hoda — FT

U danych Rasstata zafiksavana kala 410 tysiač śmierciaŭ, niepasredna źviazanych z vajnoj, piša FT. Jašče 12 tysiač čałaviek žurnalisty haziety vyjavili na padstavie ich statusu vajskoŭcaŭ, uzrostu i miesca hibieli. Taksama žurnalisty ŭličyli 42 tysiačy śmierciaŭ mužčyn pryzyŭnoha ŭzrostu, jakija zhadvajucca ŭ danych Rasstata pavodle vynikaŭ sudovych raźbiralnictvaŭ, kali svajaki nie mahli znajści cieła.

Pry hetym realnaja kolkaść zahinułych, vierahodna, bolšaja praz zatrymki z rehistracyjaj śmierciaŭ, piša hazieta. Naprykład, u 2026 hodzie praciahvałasia rehistracyja dakumientaŭ pra ludziej, jakija zahinuli padčas bitvy za Maryupal u 2022 hodzie.

Danyja Rasstata pakazvajuć asabliva vysokuju śmiarotnaść u asobnych bajach va Ukrainie. Kala 120 tysiač śmierciaŭ — tracina ad ahulnaj kolkaści zarehistravanych — prypali na rajon Aŭdziejeŭki i Pakroŭska. Jašče 48 tysiač — na susiedni Bachmucki rajon.

Bai za kožny z hetych haradoŭ sami pa sabie byli bolš krovapralitnymi, čym uvarvańnie SSSR u Afhanistan u 1979—1989 hadach, adznačajuć žurnalisty.

Infarmacyja Rasstata taksama pakazvaje, što za hady vajny rasijskaja armija pastareła. U 2025 hodzie siaredni ŭzrost zahinułaha składaŭ 40 hadoŭ suprać 34 hadoŭ u pieršy hod vajny.

Samaj šmatlikaj hrupaj stali mužčyny va ŭzroście 35—44 hadoŭ — na ich prypała 158 tysiač śmierciaŭ. Na mužčyn va ŭzroście 18—24 hadoŭ prypadała kala 10% zahinułych; ich dola skaračajecca z pačatku vajny.

FT taksama vyjaviła ŭ danych Rasstata źviestki pra 4141 zahinułaha zamiežnika, jaki vajavaŭ u składzie Uzbrojenych sił RF. Najbolš siarod ich hramadzian Uźbiekistana — 807 čałaviek i Tadžykistana — 598. Siarod krain Łacinskaj Amieryki lidziruje Kałumbija (98 zahinułych). U Afrycy najbolšaja kolkaść śmierciaŭ zafiksavana siarod hramadzian Nihieryi, Kamieruna i Jehipta — razam 127 čałaviek. U bazie taksama značacca 44 zahinułych hramadzianina Niepała, 20 hramadzian Banhładeš i 10 hramadzian Indyi.

Uzłom taksama dazvoliŭ acanić maštaby śmiarotnaści ad karanavirusa ŭ Rasii. U 2021 hodzie, pavodle hetych danych, ad COVID-19 pamierli kala 457 tysiač rasijan. Heta aznačaje, što śmiarotnaść ad karanavirusa ŭ Rasii akazałasia ŭ 2,5—3 razy vyšejšaj, čym u Vialikabrytanii i krainach Jeŭrasajuza.

Taksama z 2021 hoda ŭ Rasii ad zachvorvańniaŭ, źviazanych ź VIČ, pamierli kala 85 tysiač čałaviek, u tym liku 14 tysiač — u 2025 hodzie, piša hazieta. Dla paraŭnańnia, u Paŭnočnaj Amierycy, Zachodniaj i Centralnaj Jeŭropie ahulnaja kolkaść śmierciaŭ pa tych ža pryčynach za 2025 hod skłała mienš za 10 tysiač.

Pra ŭzłom Rasstata hrupoŭki Silent Crow i «Kibierpartyzany BY» paviedamili 1 listapada. Pavodle śćviardžeńnia chakieraŭ, im udałosia atrymać kala 23 terabajtaŭ infarmacyi. Rasstat pryznaŭ fakt kibierataki, ale admaŭlaŭ, što złamyśniki atrymali dostup da abaronienych danych.

The Economist na padstavie hetych danych sprahnazavaŭ hibiel kala 230 tysiač rasijan za ŭvieś 2026 hod — bolš, čym za luby papiaredni hod vajny. Vydańnie taksama pryvodziła acenku Silent Crow u 504 tysiačy zahinułych rasijskich vajskoŭcaŭ na 28 žniŭnia z ulikam zatrymak rehistracyi.

• 0
• 0
• 0
• 0
• 0
• 0
• 0
• 0