Kiraŭnik MZS Litvy prakamientavaŭ mahčymaść źmiakčeńnia sankcyj suprać Biełarusi i jaje rolu ŭ mirnych pieramovach
Kiraŭnik MZS Litvy Kiastucis Budrys u intervju The Kyiv Independent vykazaŭsia pra amierykanskija inicyjatyvy nakont biełaruskaha kaliju i źmiakčeńnia sankcyj, a taksama acaniŭ mahčymuju rolu Minska ŭ pieramovach ab zaviaršeńni vajny va Ukrainie.

Kiastucis Budrys nazvaŭ Biełaruś «biezumoŭnaj saŭdzielnicaj» rasijskaj ahresii i zajaviŭ, što nie bačyć padstaŭ dla pierahladu jeŭrapiejskich sankcyj. Ministr nahadaŭ, što Rasija vykarystała terytoryju i pavietranuju prastoru Biełarusi dla pačatku poŭnamaštabnaha ŭvarvańnia va Ukrainu. Tamu Vilnia nie źbirajecca asłablać sankcyi i inšyja abmiežavańni.
«Bolš za toje, ja nie mahu ŭjavić, kab niechta z 27 [krain ES] padniaŭ ruku i skazaŭ: viedajecie, na maju dumku, pavodziny Biełarusi źmianilisia va ŭsich śfierach, praź jakija my ŭviali sankcyi», — skazaŭ Budrys.
Jon prahnazuje, što ŭ lutym 2027 hoda, kali pryjdzie čas čarhovaha padaŭžeńnia sankcyj ES suprać Biełarusi, ich zachavajuć jašče na hod bieź istotnych źmien.
Pry hetym Budrys padkreśliŭ, što roźnica ŭ padychodach Vašynhtona i Brusiela pakul nie pieratvaryłasia ŭ amierykanski cisk. Pavodle jaho, ZŠA nie patrabavali ad Jeŭrasajuza pierahladać svaju pazicyju.
Baki abmiarkoŭvali Biełaruś, Litva vykłała svoj pohlad, ale nijakich dalejšych krokaŭ paśla hetych razmoŭ nie było, patłumačyŭ ministr.
Biełaruś — adzin z najbujniejšych suśvietnych pastaŭščykoŭ kalijnych uhnajeńniaŭ. Paśla sankcyj jaje dola na mižnarodnym rynku skaraciłasia. Praz sankcyi zakryli maršrut praź litoŭski port Kłajpiedy, jaki byŭ dla biełaruskaha kaliju najbolš tannym i efiektyŭnym šlacham ekspartu.
Jak raniej paviedamlałasia sa spasyłkaj na amierykanskich i jeŭrapiejskich čynoŭnikaŭ, ideju adnaŭleńnia hetaha maršrutu prasoŭvaje amierykanski pasłańnik Džon Koŭł. Adnak, pavodle surazmoŭcaŭ vydańnia The Kyiv Independent, jaho inicyjatyva nie aznačaje šyrejšaj źmieny palityki Vašynhtona.
Asobna Budrys vykazaŭsia pra rasijskuju vajskovuju prysutnaść u Biełarusi. Cichanoŭskaja spadziajecca, što hetaje pytańnie taksama možna budzie ŭźniać na mirnych pieramovach. Ministr ža razhladaje dziejańni Maskvy jak padrychtoŭku pazicyj dla budučaha handlu i paraŭnoŭvaje Biełaruś z rasijskaj «raźmiennaj manietaj».
«Jany [Rasija] robiać heta jakraz dziela budučych pieramoŭ», — skazaŭ jon.
Samastojnaj roli Minska ŭ hetym pracesie Budrys nie bačyć: «Ci źjaŭlajecca Biełaruś tut niejkim samastojnym udzielnikam? Ja hetaha nie baču».
Adnačasova Litva praciahvaje nastojvać na abmiežavańniach suprać Rasii i Biełarusi, navat kali nie atrymlivaje ahulnajeŭrapiejskaj padtrymki. U kastryčniku jana straciła prava pravieści suśvietny turnir pa piaciborji paśla taho, jak nie dazvoliła ŭdzielničać rasijskim i biełaruskim spartsmienam.
Pavodle Budrysa, heta nie pieršy vypadak, kali Litva zastajecca adna. Adsutnaść supolnaj reakcyi jon patłumačyŭ niedachopam palityčnaj voli, dadaŭšy, što niekatoryja ŭ ES mohuć «chavacca za pracedurami». Ministr ličyć, što dla abmiežavańnia ŭdziełu Rasii i Biełarusi treba vykarystoŭvać u tym liku finansavańnie i vizavuju palityku.
Kamientary
Za toje niekatoryja biełaruskija dziejačy ŭ emihracyi achvotna padymajuć ruki, adrazu abiedźvie.