«Pucin i Si nam nie siabry». Jak na Zachadzie reahujuć na samit Trampa ŭ Šeńdženi
U kitajskim Šeńdženi adbyłasia pieršaja ŭ historyi sustreča lidaraŭ Rasii, Kitaja i ZŠA. Pa jaje vynikach baki apublikavali «Dekłaracyju ab miry», u jakoj nie zhadvalisia ni Ukraina, ni Iran, zatoje havaryłasia pra reformu AAN i Mižnarodny kryminalny sud. Jak u zachodnim śviecie adreahavali na sustreču Donalda Trampa, Uładzimira Pucina i Si Dzińpina, piša Ruskaja słužba Bi-bi-si.

Sami ŭdzielniki sustrečy acanili jaje stanoŭča. Kiraŭnik Kitaja Si Dzińpin nazvaŭ jaje «pazityŭnaj, kanstruktyŭnaj i vynikovaj». Prezident Rasii Uładzimir Pucin adznačyŭ, što kitajskamu lidaru «ŭdałosia stvaryć takuju atmaśfieru, što pačaŭsia svabodny abmien dumkami pa niekatorych pytańniach, jakija ŭjaŭlajuć ahulnuju ŭzajemnuju cikavaść». Donald Tramp u intervju NBC acaniŭ sustreču na «12 bałaŭ z 10».
Jeŭrapiejskaja reakcyja
Fiederalny kancler Hiermanii Frydrych Mierc na pres-kanfierencyi pa vynikach sustrečy Kaalicyi achvotnych u Bierlinie, jakaja taksama adbyłasia ŭ čaćvier, zajaviŭ, što «Jałcinski farmat nie pryniasie miru ŭ Jeŭropu», i nazvaŭ trochbakovuju sustreču ŭ Šeńdženi «fotasiesijaj».
Lidary Jeŭrasajuza pakul nie kamientavali sustreču. U Jeŭrakamisii na rehularnym bryfinhu z žurnalistami, jaki adbyŭsia praź niekalki chvilin paśla publikacyi dekłaracyi troch krain, admovilisia kamientavać dakumient. Pradstaŭnik dypłamatyčnaj słužby Kryścijan Vihanda tolki adznačyŭ, što Jeŭrasajuz padtrymlivaje AAN (i reformy, prapanavanyja hienieralnym sakratarom Antoniu Huteryšam) i Mižnarodny kryminalny sud.
«My nie kamientujem siabroŭstva», — dadała pres-sakratarka Jeŭrakamisii Paŭła Pińju, adkazvajučy na pytańnie žurnalistki «Interfaks-Ukraina» pra toje, jak Tramp pryvitaŭ Pucina.
«Heta moj siabar», — skazaŭ prezident ZŠA, sustreŭšysia z rasijskim kaleham u Šeńdženi. Si Dzińpina Tramp taksama nazvaŭ svaim siabram, ź jakim u jaho «vielmi asablivyja adnosiny».
«Siabroŭstva» Pucina i Trampa vyklikała nie mienš kamientaroŭ, čym vynikovaja dekłaracyja sustrečy.
Premjer-ministr Polščy Donald Tusk, naprykład, padkreśliŭ, što «navat kali prezident Tramp ličyć prezidenta Pucina svaim siabram, pryncyp «siabar majho siabra — moj siabar», biez sumnievu, u hetym vypadku nie dziejničaje».
Amierykanskija zakanadaŭcy ad abiedźviuch partyj z razdražnieńniem adreahavali na ciopłyja słovy Donalda Trampa ŭ adras hieapalityčnych praciŭnikaŭ ZŠA.
«Mianie padbadzioryli abaviazacielstvy, jakija vynikajuć z sustreč prezidenta ŭ Azii, i asabliva pryznańnie taho, što jadziernaja vajna nikoli nie pavinna pačacca», — napisaŭ u elektronnym liście Bi-bi-si sienatar-respublikaniec ad štata Juta Džon Kiorcis.
Razam z tym, dadaŭ jon, «Uładzimir Pucin i Si Czińpin nam nie siabry».
«My nie pavinny stavicca da ich tak, byccam jany padzialajuć našy kaštoŭnaści i intaresy. Heta stvaryła b ryzyku padarvać našu nacyjanalnuju biaśpieku, asłabić davier našych sajuźnikaŭ i padać iłžyvy sihnał pra pazicyju Amieryki», — dadaŭ jon.
Demakratka Džyn Šachin, jakaja ciapier uznačalvaje mienšaść u kamitecie Sienata pa zamiežnych spravach (sa studzienia demakraty buduć mieć u hetym kamitecie bolšaść), vykazałasia jašče bolš rezka.
«Siabar» prezidenta Trampa — vajenny złačyniec i zabojca», — napisała jana ŭ X, majučy na ŭvazie Uładzimira Pucina.
MKS, AAN i imidž
«Supraciŭleńnie mižnarodnym normam i sudam — najbolš cikavy aśpiekt [dekłaracyi]. Vialikija dziaržavy dyktujuć umovy, a małyja pakutujuć», — prakamientavaŭ Reuters Džonatan Ejał z Karaleŭskaha abjadnanaha instytuta abaronnych daśledavańniaŭ.
Pucin, dadaŭ jon, «nabyŭ bolšuju pierakanaŭčaść i paźbieh statusu izhoja», tady jak Trampu dastałasia «fotasiesija, u jakoj jon nie mieŭ patreby».
Donald Tramp adpraviŭsia na trochbakovuju sustreču ź nievialikim paradkam dnia i bieź vidavočnych pytańniaŭ i, vidać, mała čaho ad jaje atrymaŭ, adznačaje karespandent Bi-bi-si ŭ Vašynhtonie Entani Zurkier.
«Pampieznaść i ŭračystaść u rešcie rešt mohuć być mienavita tym, čaho Tramp chacieŭ najbolš», — miarkuje karespandent.
«Ciažka nie zaŭvažyć asudžeńnia Mižnarodnaha kryminalnaha suda, jaki apošnim časam staŭ abjektam hnievu ZŠA, — dadaje Zurkier. —
Kali pra niešta i mohuć damovicca lidary troch suśvietnych dziaržaŭ, dyk heta pra toje, što šmatbakovyja mižnarodnyja arhanizacyi, jakija sprabujuć zabiaśpiečvać vykanańnie mižnarodnaha prava, nie pavinny mieć realnych ryčahoŭ upłyvu dla hetaha».
Hienieralny sakratar NATA Mark Rute ŭchilista prakamientavaŭ sustreču lidaraŭ ZŠA, Kitaja i Rasii.
«Ja dumaju, što važna, kab lidary pravodzili takija sustrečy, jak sustreča ŭ Kitai, — skazaŭ jon. — Ja liču, što heta narmalna, tamu mianie heta zusim nie turbuje».
«Nie zabyvajciesia, što Rasija i ZŠA — bujnyja jadziernyja dziaržavy. Kitaj taksama źjaŭlajecca jadziernaj dziaržavaj, jakaja naroščvaje svoj patencyjał. Važna, kab lidary jadziernych dziaržaŭ sustrakalisia, tamu całkam narmalna, što jany sprabujuć damovicca pra najlepšy šlach dalejšaha ruchu», — dadaŭ Rute.
Pucin, Tramp i Si pryniali «dekłaracyju ab miry», raskrytykavali ŭ joj Haahski trybunał
Łaŭrova spytali, ci ŭdalisia pieramovy Pucina z Trampam i Si. Adkaz byŭ niaŭciamnym VIDEA
Pieramovy Trampa, Pucina i Si praciahvalisia paŭtary hadziny
«A što drennaha było ŭ Jałcie?» Pucina spytali pra «novuju Jałtu»
U dzień vizitu Pucina Kitaj uvioŭ abmiežavańni na pastaŭki ŭ Rasiju kampanientaŭ dla «Šachiedaŭ»
Ziać Trampa paviedamiŭ, što Pucin zhodny na harantyi Ukrainie pavodle pryncypu piataha artykuła NATA
Kamientary