U Biełarusi stvarajuć adziny ličbavy rejestr ahraekasiadzib, a taksama spraščajuć administracyjnyja pracedury dla ich uładalnikaŭ. Adpaviednuju pastanovu padpisaŭ premjer-ministr Alaksandr Turčyn. Dakumient nabudzie moc 20 listapada.

Pastanova stała praciaham ukaza Alaksandra Łukašenki ad 18 žniŭnia 2026 hoda № 275 «Ab raźvićci ahraekaturyzmu».
Hałoŭnym novaŭviadzieńniem stanie stvareńnie Adzinaha ličbavaha rejestra subjektaŭ ahraekaturyzmu. Jon vyznačyć paradak farmavańnia i viadzieńnia infarmacyjnaj bazy, u jakoj buduć sabranyja źviestki pra ŭsie ahraekasiadziby i pasłuhi, jakija jany prapanujuć.
Na praciahu miesiaca rajvykankamy pavinny stvaryć asabistyja kabiniety dla ŭładalnikaŭ dziejnych ahraekasiadzib. Ciapier u Biełarusi naličvajecca bolš za 1440 takich abjektaŭ. Asabistyja kabiniety raźmieściać na dziaržaŭnaj ličbavaj płatformie «Razumny horad (rehijon)», raspracoŭkaj jakoj zajmajecca Ministerstva suviazi.
Dla turystaŭ rejestr budzie vykonvać funkcyju zručnaha anłajn-katałoha ahraekasiadzib. Ich uładalniki atrymajuć dadatkovuju mahčymaść papularyzavać svaje abjekty, a dziaržava — instrumient dla bolš dakładnaha analizu stanu haliny.
Taksama dakumient praduhledžvaje mahčymaść afarmleńnia nieabchodnych dakumientaŭ praź internet. Zajaŭku ab pačatku dziejnaści ahraekasiadziby abo ab vykarystańni śpiecyjalnaha zboru ciapier možna budzie padać dystancyjna praz adziny partał elektronnych pasłuh. Pry hetym zachavajecca i mahčymaść padavać dakumienty ŭ zvykłym papiarovym vyhladzie ŭ rajvykankamy.
Akramia taho, u pastanovie vyznačyli poŭny pieralik dakumientaŭ, nieabchodnych dla atrymańnia lhotnaha kredytu pad 5% hadavych. Takija pazyki vydaje «Biełahraprambank» na realizacyju prajektaŭ u śfiery ahraekaturyzmu. Urad raźličvaje, što dakładna vyznačanyja patrabavańni dazvolać uładalnikam ahraekasiadzib radziej naviedvać bank i paskorać praces afarmleńnia kredytaŭ.
U pastanovie taksama zaćvierdžanyja typavyja formy damoŭ ab vykanańni pasłuh pamiž ahraekasiadzibami i turystami abo arhanizacyjami, u tym liku turapieratarami. Akramia hetaha, vyznačany paradak pryniaćcia rajvykankamami rašeńniaŭ ab dazvole na dziejnaść u śfiery ahraekaturyzmu i praviły pracy rajonnych kamisij, jakija buduć kompleksna aceńvać dziejnaść ahraekasiadzib.
Kamientary