Hramadstva11

U Łunincy źjaviŭsia vahon-restaran, dziela jakoha tudy jeduć ź inšych haradoŭ

Restaran abstalavali prosta ŭ sapraŭdnym čyhunačnym vahonie. Zaviadzieńnie ŭžo nazyvajuć novaj fiškaj rajcentra i zavablivajuć naviedvalnikaŭ stravami biełaruskaj kuchni, piša Onliner.by.

Łuniniec — horad, dzie žyvuć sotni biełarusaŭ, jakija pastaŭlajuć va ŭsiu krainu kłubnicy. Vialikim rajcentram jaho dakładna nie nazavieš, zabaŭ tut nie tak šmat, jak u bujnych haradach. Tamu źjaŭleńnie restarana ŭ sapraŭdnym čyhunačnym vahonie stała dla mnohich miascovych žycharoŭ sapraŭdnaj padziejaj. Nu a dzie jašče ŭ Biełarusi možna paviačerać u vahonie, jaki nikudy nie jedzie?

— Jedu ja niejak na pracu i baču, jak kala handlovaha centra «Majak» vialiki kran trymaje čyhunačny vahon. Ja paśla navat jašče kruh zrabiła, kab pahladzieć, što tut adbyvajecca. Dla horada heta, viadoma, niešta niezvyčajnaje, — raspaviała adna ź miascovych žycharak.

Raźmieščany doŭhi zialony vahon pobač ź miascovym lodavym pałacam i handlovym centram «Majak». Pa susiedstvie niekalki altanak i kafe «Blizka».

Vahon — heta nie samastojnaja ŭstanova, a častka vialikaha prajekta hramadskaha charčavańnia.

Dzie šukać restaran

Adras: Łuniniec, vulica Čyrvonaja, 160

Čas pracy: Z 10:00 da 23:00 (paniadziełak — čaćvier), z 10:00 da 01:00 (piatnica — niadziela)

Jak dabracca: Hałoŭnyja aryjenciry — ladovy pałac i handlovy centr «Majak». Kali pryjechali ŭ Łuniniec na ciahniku abo maršrutcy, da restarana zručniej za ŭsio dabracca na taksi.

Što praŭda, zakazvać ježu treba jakraz u «Blizka», a potym aficyjanty pryniasuć jaje prama ŭ kupe. 

Jość pravadnica. Ale heta zvyčajny maniekien u kaściumie rabotnicy Biełaruskaj čyhunki. Adrazu za ŭvachodam prybiralnia — pryčym pracoŭnaja, usio jak naležyć. Dalej — słužbovaje pamiaškańnie pravadnika, niekalki kupe i ahulnaja zała.

Možna začynicca ad starońnich vačej, uźleźci na vierchniuju palicu i padramać, a možna ŭvohule ŭdakładnić čyhunačnuju ramantyku: apuścić rułonnuju štoru i schavacca ad dapytlivych pohladaŭ.

Ale, jak paźniej raspavioŭ dyrektar kompleksu, rabić heta zabaroniena, a za paradkam sočać z dapamohaj kamier videanazirańnia.

Kupe praktyčna ničym nie adroźnivajecca ad sapraŭdnaha, chiba što stoł padoŭžyli, kab chapiła miesca dla talerak, šklanki i stakanaŭ. Vyhladaje aŭtentyčna, i amatary padarožžaŭ na ciahnikach dakładna aceniać.

Padrabiazna apisvać hastranamičnyja ŭłaścivaści straŭ nie budziem: my ž nie ŭ restaranie vysokaj kuchni.

Pielmieni akazalisia całkam zvyčajnymi pielmieniami, «Cezar» byŭ sytnym na svaje 18 rubloŭ, a voś ad vizualna simpatyčnaha šašłyka čakałasia bolšaha.

Taksama ŭ mieniu vahona-restarana jość sapraŭdnyja ślimaki pa-burhundsku z arechavym sousam, kary i tam-jamam. Padajuć, jak u restaranach Paryža: sa śpiecyjalnymi štučkami i videlcami dla ślimakoŭ. Vyhladaje pryhoža, dy i na smak davoli niadrenna.

Tamu, kali stamilisia dranikami i chočacca pakaštavać niešta niezvyčajnaje ŭ čyhunačnym vahonie, nie strymlivajcie siabie i biarycie ślimakoŭ — nie pamyliciesia.

Što pa koštach

  • Pica — 17 rubloŭ.
  • Set sa ślimakoŭ — 28 rubloŭ.
  • Chinkali — 3 rubli za štuku.
  • Boršč z hrenkami — 10 rubloŭ.
  • Pielmieni — 12 rubloŭ.
  • Burhier — 10 rubloŭ.
  • Šašłyk — ad 6,5 rubla za 100 hramaŭ.

Kožny raz biehčy ŭ stacyjanarnaje kafe, kab zrabić zakaz, nieabaviazkova. Dastatkova daviedacca numar telefona barmena, patelefanavać — i tabie pryniasuć usio prosta ŭ kupe. Zručna, viadoma, ale ŭsio roŭna nie chapała barnaj stojki ŭnutry vahona.

Chaciełasia adčuć toj samy vajb staroha vahona-restarana, jaki pad huk kołaŭ imčycca pa relsach kudyści ŭdal.

Što ž, padviadziem vyniki.

  • Vahon-restaran — kłasny atrakcyjon dla tych, kamu nadakučyli zvyčajnyja kafe. Dla rajcentra ideja vydatnaja. Tut možna nie tolki pasiadzieć ź siabrami, ale i zładzić niezvyčajny bankiet.
  • Sam vahon vyhladaje tak, byccam by jaho tolki ŭčora źniali z rejek. Unutry zachavałasia praktyčna ŭsio. Kuplać bilety, dakładniej braniravać miescy, nam nie pryjšłosia. U subotni viečar svabodnyja kupe jašče byli, ale bližej da nočy ŭstanova prykmietna ažyviłasia.
  • Ceny całkam demakratyčnyja. Mieniu raznastajnaje: jość sałaty, stejki, burhiery i zvyčajnaja pica. Nu a kali duša patrabuje čaho-niebudź niezvyčajnaha, biarycie ślimakoŭ. 

«Ideja naležyć nam z mužam»

Dyrektarka kafe «Blizka» Hanna Paŭlukievič raspaviała, što vahon-restaran — ich siamiejny prajekt z mužam. Vahon nabyli letaś, a pieršyja naviedvalniki ŭstanova pryniała bližej da kanca 2025 hoda.

— Hanna, isnujuć roznyja viersii na kont taho, kamu naležyć vahon-restaran. U pryvatnaści, kažuć, što ŭ jaho kuplu ŭkłaŭsia starońni inviestar. Pry hetym u adnym z rolikaŭ vy nazyvali ŭstanovu siamiejnym prajektam. Jak usio adbyvajecca nasamreč i adkul źjaviłasia takaja ideja?

— Pačniom z taho, što naš Łuniniec źjaviŭsia dziakujučy čyhuncy. Kali b nie jana, mahčyma, i horada b nie było. U nas šmat siamiejnych dynastyj čyhunačnikaŭ. Moj dziadula taksama pracavaŭ na čyhuncy, maci pačynała tam svaju pracoŭnuju dziejnaść. A pobač ź miescam, dzie my ŭstalavali vahon, znachodzicca pomnik čyhunačnikam. Tamu ŭsio nie prosta tak.

Što tyčycca inviestaraŭ, to ich u nas, viadoma ž, nie było. Ideja nabyćcia vahona naležyć nam z mužam. Jaho vystaŭlali na prodaž, i my nabyli na aŭkcyjonie. Pryčym čyhunka pajšła nam nasustrač i nadała rasterminoŭku.

Na prodaž vystaŭlali šmat vahonaŭ, tak što vybar byŭ. Ale nam spadabaŭsia mienavita hety, 1984 hoda vypusku. Ja sama naradziłasia ŭ tym ža hodzie, tamu dla mianie heta było simvaličnym. Da taho ž vahon apynuŭsia jakasnym i ŭtulnym.

— Nakolki na papularnaść upłyvali błohiery?

— Jany zrabili svaju spravu. Paśla ich publikacyj da nas stali pryjazdžać ludzi sa Stoŭbcaŭ i inšych bližejšych rajonaŭ. Dla mnohich heta ŭ navinku.

— Na što ŭ mieniu robicie ŭpor?

— Biełaruskaja kuchnia. U nas jość smačnyja bliny z roznaj načynkaj, draniki, stejki… Jość i ślimaki. Mnohim heta nie padabałasia, maŭlaŭ, kuchnia nie naša, ale ślimaki ŭ nas taksama ź Biełarusi.

— Praz hod pracy vy zadavolenyja hetym prajektam?

— Viadoma. My z mužam ukłali ŭ jaho ŭsiu dušu. Nas usio zadavalniaje, i tych metaŭ, jakija stavili pierad saboj, my dasiahnuli. Ale ŭsio heta zapatrabavała vielizarnych namahańniaŭ. Ja, naprykład, praktyčna kruhłasutačna znachodžusia na pracy. Heta ž naša sprava.

Kamientary1

  • Konsuł
    21.11.2026
    Cezar u Łununcy kaštuje 6 dalaraŭ??? Ale ž heta takaja ž cana, jak u Niu Jorku...

Ciapier čytajuć

«Heta takaja drobnaja, ahidnaja pomsta Ramana». Sofja Sapieha raskazała, jak jaje padmanam źniali dla pieradačy Pratasieviča12

«Heta takaja drobnaja, ahidnaja pomsta Ramana». Sofja Sapieha raskazała, jak jaje padmanam źniali dla pieradačy Pratasieviča

Usie naviny →
Usie naviny

Vyznačyŭsia supiernik zbornaj Biełarusi ŭ stykavym matčy Lihi nacyj5

19‑hadovy bieraściejec Andrej likvidavany pad Kurdziumaŭkaj22

Ukraina naniesła ŭdar pa štabie armii ŭ Biardziansku. Zahinuli siamiora vajskoŭcaŭ, u tym liku syn hienierała3

Vyžyć na 1500 rubloŭ? Niekatoryja minčanie kažuć, što heta realna11

Estonija z 1 śniežnia zakryvaje miažu z Rasijaj4

U Minsku pradajuć «Žyhuli» z matoram na 300 sił2

Ukraina siońnia źbiła 79 kryłatych rakiet z 84, ale nie maje čym źbivać balistyku1

Padčas rasijskaha ŭdaru pa Lvovie tam była biełaruskaja delehacyja5

«Ludzi pjuć z bałota». Łukašenka aburyŭsia jakaściu vady ŭ Smarhoni4

bolš čytanych navin
bolš łajkanych navin

«Heta takaja drobnaja, ahidnaja pomsta Ramana». Sofja Sapieha raskazała, jak jaje padmanam źniali dla pieradačy Pratasieviča12

«Heta takaja drobnaja, ahidnaja pomsta Ramana». Sofja Sapieha raskazała, jak jaje padmanam źniali dla pieradačy Pratasieviča

Hałoŭnaje
Usie naviny →

Zaŭvaha:

 

 

 

 

Zakryć Paviedamić