Мінскім абласным судом 16 ліпеня вынесены прыгавор па крымінальнай справе ў дачыненні да 25-гадовага непрацуючага, раней судзімага жыхара Стаўбцоўскага раёна, які абвінавачваецца ва ўчыненні злачынства, прадугледжанага ч. 1 арт. 14, п.п. 5, 6 ч. 2 арт.139 КК (замах на наўмыснае супрацьпраўнае пазбаўленне жыцця іншага чалавека (замах на забойства),учыненае агульнанебяспечным спосабам і з асаблівай жорсткасцю).
Як паведамілі БелаПАН у прэс-службе Вярхоўнага суда, па гэтым складзе злачынства мужчына прызнаны вінаватым і прыгавораны да 15 гадоў пазбаўлення волі.
Ён жа судом Стаўбцоўскага раёна 6 студзеня гэтага года, ужо змешчаны пад варту па справе аб замаху на забойства, быў прыгавораны да аднаго года пазбаўлення волі за невыкананне патрабаванняў прэвентыўнага нагляду (арт. 421 КК).
Цяпер у адпаведнасці з ч.ч. 3, 5 арт. 72 КК па сукупнасці злачынстваў, шляхам поўнага складання прызначаных пакаранняў па прыгаворы Мінскага абласнога суда ад 16 ліпеня і па прыгаворы суда Стаўбцоўскага раёна ад 6 студзеня абвінавачванаму канчаткова прызначана пакаранне ў выглядзе пазбаўлення волі тэрмінам на 16 гадоў з адбываннем пакарання ў папраўчай калоніі ва ўмовах строгага рэжыму.
У адпаведнасці з ч. 1 арт. 107 КК да абвінавачванага прыменены меры прымусовага лячэння ад хранічнага алкагалізму.
Прыгавор можа быць абскарджаны і апратэставаны ва ўстаноўленым законам парадку.
Нагадаем, 25-гадовы непрацуючы малады чалавек быў затрыманы 3 студзеня гэтага года. Знаходзячыся дома ў вёсцы Сцяцкі Стаўбцоўскага раёна, на глебе асабістых непрыязных адносін да сваёй маці 1967 года нараджэння, маючы намер пазбавіць яе жыцця, падчас сну апошняй выліў ёй на галаву, шыю, грудзі і рукі лёгкаўзгаральную вадкасць і падпаліў. Аднак яе сужыцель выклікаў «хуткую», і жанчыне была своечасова аказана кваліфікаваная медыцынская дапамога.
Ёй былі нанесеныя цяжкія цялесныя пашкоджанні, якія пацягнулі за сабой расстройства здароўя, абязвечаны твар і шыя.
Каментары