На картачны рынак Беларусі, імаверна, прыйдуць сістэма American Express і адна з азіяцкіх плацежных сістэм, сведчаць даныя Нацыянальнага банка.
«З вялікай доляй імавернасці на эмісійны сегмент картачнага рынку Беларусі прыйдзе American Express — адпаведныя мерапрыемствы, скіраваныя на пачатак эмісіі картак гэтай сістэмы, ужо праводзяцца адным з беларускіх банкаў», — інфармуюць спецыялісты галоўнага банка краіны ў артыкуле, апублікаваным у часопісе «Банковский вестник» Нацбанка.
Акрамя таго, чакаецца, што на беларускі рынак пластыкавых карт выйдзе адна з азіяцкіх плацежных сістэм. «Але гэта кітайская UnionPay ці японская JCB, будзе залежаць ад актыўнасці саміх сістэм, бо рынак гатовы да працы з імі, і першай выйдзе тая, якая прапаноўвае банкам найболей цікавыя ўмовы як з пункту гледжання цэнавых характарыстык, так і з пункту гледжання тэхналагічных рашэнняў», — адзначаюць прадстаўнікі Нацбанка.
Цяпер эмітуюць пластыкавыя карткі міжнародных плацежных сістэм Visa і MasterCard, а таксама нацыянальнай плацежнай сістэмы «Белкарт».
Паводле даных Нацыянальнага банка, на 1 ліпеня 2015 года ў абароце знаходзілася 12,26 млн. плацежных картак. Пры гэтым доля рублёвых картак склала 96,1%, валютных — 3,9%. Для параўнання: на 1 студзеня 2011 года ў абароце знаходзілася 9,95 млн. картак, у тым ліку 98,3% рублёвых, 1,7% валютных.
На долю дэбетавых на 1 ліпеня прыпадала 98,4% плацежных картак, якія знаходзіліся ў абароце, на долю крэдытных — 1,6% картак.
Трэба таксама адзначыць, што доля актыўных картак у Беларусі, гэта значыць тых, якімі карысталіся хаця б адзін раз за квартал, на 1 ліпеня 2015 года складала 63% ад агульнай колькасці.
Цяпер чытаюць
Куды цяпер едуць вучыцца беларускія студэнты — топ краін і тэндэнцый14
Каментары