Школьнікі з Гродзенскага раёна шпіталізаваныя сёння з сімптомамі атручвання невядомай этыялогіі, паведаміў начальнік упраўлення аховы здароўя Гродзенскага аблвыканкама Андрэй Стрыжак.
У бальніцы на дадзены момант знаходзяцца 35 дзяцей. Іх жыццю нічога не пагражае.
Каля 12.30 11 лютага дзяжурны фельчар хуткай медыцынскай дапамогі паведаміў у службу 101 аб масавым паступленні дзяцей з прыкметамі атручвання. Да месца здарэння былі накіраваныя медыкі і ратавальнікі-хімікі на аўтамабілі хімічнай і радыяцыйнай абароны. Таксама прыцягнуты спецыялісты газавай службы Гродна і абласнога цэнтра гігіены, эпідэміялогіі і грамадскага здароўя, паведамляе МНС Беларусі.
Высветлілася, што ў дзяцей, якія займаліся на другім паверсе школы, адбылося рэзкае пагаршэнне здароўя (галавакружэнне, млоснасць, ваніты, павышэнне тэмпературы цела і артэрыяльнага ціску). Праведзеныя замеры паветра на ўтрыманне шэрагу хімічных рэчываў паказалі, што небяспечнай канцэнтрацыі няма, радыяцыйны фон не перавышаны. Цэнтр гігіены, эпідэміялогіі і грамадскага здароўя таксама праводзіць замеры на наяўнасць шкодных рэчываў, вынікі якіх будуць вядомыя пазней.
Усе, хто звярнуліся па дапамогу, дастаўлены ў Гродзенскую абласную дзіцячую клінічную бальніцу. Навучальны працэс часова прыпынены. Бацькі праінфармаваныя аб неабходнасці кантраляваць стан сваіх дзяцей і неадкладна звяртацца ў выпадку пагаршэння здароўя ў медыцынскія ўстановы. У бальніцы псіхалагічную дапамогу аказвае псіхолаг МНС.
Цяпер чытаюць
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?13
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары