Губернатар Саратаўскай вобласці (РФ) Валерый Радаеў прапанаваў кіраўніцтву мясцовага завода СЭПА, які вырабляе ў асноўным халадзільнікі, наладзіць выпуск смартфонаў iPhone 7.
«Давайце зараз разам iPhone 7 выпусцім у Саратаве», — сказаў губернатар дырэктару прадпрыемства Яўгену Рэзніку пасля таго, як той выступіў з дакладам аб рабоце завода.
Як паведамляюць мясцовыя СМІ, у адказ Рэзнік усумніўся, што ў вобласці хопіць сродкаў на куплю ліцэнзіі. «Нам усяго хопіць», — супакоіў яго губернатар.
Радаеў таксама пахваліў працу прадпрыемства і расказаў, што бачыў халадзільнік «Саратаў», які выпускаецца заводам, у Афрыцы. Там, па словах губернатара, агрэгат паспяхова канкуруе з сусветнымі брэндамі.
Мабільныя тэлефоны пад брэндам iPhone выпускае амерыканская карпарацыя Apple, збіраюцца яны пераважна ў Кітаі. Пры гэтым сёмая мадэль iPhone пакуль не выпушчаная і нават не анансаваная.
На дадзены момант самай сучаснай версіяй смартфонаў ад Apple застаецца iPhone 6S. Пры гэтым у сеціве з'явіліся чуткі, згодна з якімі наступнай навінкай кампаніі стане не iPhone 7, а iPhone 5SE.
