Буйное ўзгаранне здарылася днём 18 чэрвеня на наваполацкім ААТ «Палімір».
Як паведамілі ў Наваполацкім гарадскім аддзеле МНС, інфармацыя пра здарэнне паступіла ў 13.12. Адбывалася факельнае гарэнне, вышыня факела складала каля 4 метраў на этажэрцы газаразмеркавання вышынёй 30 метраў корпуса № 305 цэха № 104. Пажар быў лакалізаваны ў 14.22.
«Пагрозы здароўю жыхароў горада і тых, хто знаходзіцца на заводзе, няма. Сітуацыя пад кантролем», — падкрэслілі ў МНС.
Інфармацыю пра выбух, які папярэднічаў узгаранню, у МНС пакуль не пацвярджаюць. Між тым, як паведамляюць у сацсетках, выбуховую хвалю адчулі адпачывальнікі на возеры Люхава і ў дамах, што непадалёк.
Варта зазначыць, што ў канцы красавіка на «Паліміры» здарыўся выкід этылену, пацярпелых не было.
«Палімір» — буйное хімічнае прадпрыемства, якое вырабляе поліэтылен, акрылавае валакно, прадукты арганічнага сінтэзу і вуглевадародных фракцый. Экспартуе прадукцыю ў Расію, Украіну, Германію, Фінляндыю, Польшчу, Іран, Венгрыю, Балгарыю, Кітай і іншыя краіны.
Цяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых1919
Каментары