Дзіцячы пашпарт трэба будзе мяняць штопяць гадоў, але за афармленьне перастануць браць грошы.
Зьмяніліся правілы выезду за мяжу дзяцей, якія зьяўляюцца грамадзянамі Беларусі. Пра гэта на прэсавай канфэрэнцыі паведаміў кіраўнік упраўленьня па грамадзянству і міграцыі Мікалай Шэўчык.
Галоўная зьмена датычыцца тэрміну дзеяньня пашпарту. Яго мусіць атрымліваць любое беларускае дзіця, якое едзе за мяжу. Раней пашпарт, атрыманы нават у пялюшках, дзейнічаў да дасягненьня дзіцёнкам 16-ці гадоў. Праз гэта на мяжы часта ўзьнікалі праблемы. Памежнікі не пазнавалі 16‑гадовых юнакоў і дзяўчат, якія для пашпарту былі сфатаграфаваныя яшчэ ў пампэрсах. Таму й была прынятая норма, што пашпарт будзе дзейнічаць толькі 5 гадоў. Гэта, магчыма, дадасьць нязручнасьці бацькам, але палегчыць працу памежнікам.
Апроч таго, цяпер пашпарты дзецям будуць выдавацца бясплатна. Раней трэба было аплаціць саму кніжачку пашпарта й кампутарныя паслугі — разам каля 10 даляраў. Да таго ж, ад Новага году й дазвольны штамп на выезд за мяжу непатрэбны — на 5 гадоў ён каштаваў каля 35 даляраў.
Нормы адносна дазволаў бацькоў засталіся ранейшыя. Калі дзіця едзе за мяжу з адным з бацькоў, патрэбны натарыяльна засьведчаны дазвол другога. Калі едзе з трэцяй асобай, патрэбны дазвол абодвух бацькоў, дзе пазначана, з кім канкрэтна яны адпускаюць дзіця за мяжу. Калі ж адзін з бацькоў адмаўляецца выпускаць дзіця за мяжу, дазвол можа даць толькі суд.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?12
Каментары