Беларускі рэспубліканскі саюз моладзі разлічвае на льготы для валанцёраў арганізацыі пры паступленні ў ВНУ, паведаміла сакратар ЦК ГА «БРСМ» Вікторыя Мяннанава 2 снежня ў Мінску на прэс-канферэнцыі, прысвечанай Сусветнаму дню валанцёраў (5 снежня).
Паводле яе слоў, БРСМ раней звярнуўся ў Мінадукацыі з прапановай даць пры іншых роўных ільготы пры паступленні ў ВНУ на спецыяльнасці сацыяльнай накіраванасці валанцёрам, якія маюць асабістую кніжку валанцёра. Такіх людзей у Беларусі каля пяці тысяч, а ўсяго ў валанцёрскім руху БРСМ занята прыкладна 34 тысяч чалавек.
«Паводле нашай інфармацыі, прапановы ўнесеныя ў праект указа прэзідэнта, які зацвярджае правілы паступлення ў ВНУ», — сказала Мяннанава.
Начальнік упраўлення па справах моладзі Міністэрства адукацыі Наталля Пшанічная пацвердзіла, што ведамства рыхтуе праект указа кіраўніка дзяржавы, які зацвярджае правілы паступлення ў ВНУ, але ў новых правілах прыёму ў ВНУ, па якіх абітурыенты будуць паступаць у 2017 годзе, ільгот для валанцёраў БРСМ не будзе.
Актуальная рэдакцыя правілаў прыёму ў ВНУ дзейнічае з 2014 года, калі ў краіне адмянілі асобны конкурс для выпускнікоў сельскіх і гарадскіх устаноў адукацыі. Цяпер БРСМ, па сутнасці, ініцыюе ўвядзенне новай ільготы, якая будзе засноўвацца не на паспяховасці, а на прыналежнасці да пэўнай грамадскай арганізацыі і ўдзеле ў яе праектах.
Намеснік генеральнага сакратара Беларускага таварыства Чырвонага Крыжа Іна Лемяшэўская выказала меркаванне, што ў выпадку разгляду пытання аб ільготах валанцёрам пры паступленні ў ВНУ неабходна даць іх і прадстаўнікам іншых арганізацый.
«На мой погляд, — сказала яна, — калі мы гаворым пра сацыяльную значнасць дзейнасці валанцёраў у цэлым, то не павінны абмяжоўвацца прэферэнцыямі членам нейкай адной арганізацыі. Для ўсіх валанцёраў неабходна таксама разгледзець пытанне аб захаванні заработнай платы па асноўным месцы працы, калі валанцёр дапамагае людзям падчас надзвычайных сітуацый. Любыя нарматыўныя дакументы, якія закранаюць гэтую дзейнасць, неабходна шырока абмяркоўваць на ўзроўні розных ведамстваў і грамадскіх арганізацый».
Разам з тым Лемяшэўская адзначыла, што для любой арганізацыі з'яўляецца вельмі адказным арганізаваць улік валанцёраў і выдачу дакументаў, якія пацвярджалі б удзел у дзейнасці руху.
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары