Збітыя на Дзень Волі: праваабаронца Аляксей Лойка шпіталізаваны, міліцыя просіць забраць заяву
25 сакавіка зранку юрыст Аляксей Лойка праходзіў трэнінг па назіранні за мірнай дэманстрацыяй на Дзень Волі. Сустрэча праходзіла на офісе Праваабарончага цэнтра «Вясна». Каля 13-й, за гадзіну да збора на мітынг, пачаўся штурм офіса. Пасля затрымання актывіст быў дастаўлены ў шпіталь хуткай дапамогі з чэрапна-мазгавой траўмай.
«Мне не пашчасціла стаяць каля дзвярэй, калі іх выбілі», — сказаў назіральнік. Лойка атрымаў некалькі ўдараў па корпусе, пасля чаго яго выцягнулі з кватэры, павалілі на падлогу, нанеслі ўдар нагой па галаве і некалькі хвілін трымалі ботам галаву на падлозе. Я не адразу зразумеў, што адбывалася і не ўцяміў, хто ўварваўся ў офіс, бо людзі былі ў цывільнай вопратцы. Кожнае сваё дзеянне яны суправаджалі мацюкамі. Падумаў — «бандыты», не інакш», — узгадвае юрыст Аляксей Лойка.
На бетоннай падлозе пад’езда Лойка праляжаў каля сямі хвілін, пасля чаго хлопца завялі ў памяшканне, у якім яго, як і іншых гасцей офіса, паставілі тварам да сцяны. Усім загадалі пакласці рукі на сцяну.
«Я так доўга не мог стаяць, бо рука зацякла пасля лёжкі на бетоннай падлозе. Апусціў руку і атрымаў у той жа момант удар па нырках. Шчыра, мне так балела галава, што не адразу зразумеў, што адбывалася. Толькі ў шпіталі лекары зафіксавалі гематому ў той вобласці» — дадаў Лойка.
Каля 50 чалавек, якія знаходзіліся на офісе ПЦ «Вясна», былі дастаўленыя ў Першамайскі РУУС, у тым ліку замежныя журналісты. Пасля некалькіх гадзін у міліцыі затрыманыя былі адпушчаныя. Юрыст пачуваўся блага. На шчасце, побач з будынкам Першамайскага РУУС знаходзілася карэтка хуткай дапамогі, якая даставіла Лойку ў шпіталь хуткай дапамогі.
У шпіталі назіральніку паставілі дыягназ «страсенне мозга лёгкай ступені» і зафіксавалі шматлікія пашкоджанні мяккіх тканак. Там жа Лойка аформіў зварот у пракуратуру па факце збіцця і неправамоцных дзеянняў супрацоўнікаў праваахоўных ворганаў.
«Увечары мне тэлефанаваў супрацоўнік пракуратуры і прасіў забраць заяву. Сказаў, што добра, што цэлы, што выйшла непаразуменне. Няхілае непаразуменне з пабітай галавой і ныркамі. Колькі разоў назіраў за акцыямі і ніколі такога не бачыў», — дадаў пацярпелы.
Агулам, паводле дадзеных ПЦ «Вясна», за 25 сакавіка было затрымана звыш за 700 чалавек.
Арыштавалі прадстаўнікоў кампаніі Bayer у Беларусі15
Каментары