Следчы камітэт спыніў справу салдата, знойдзенага павешаным у Печах 31 сакавіка
Следчы камітэт спыніў крымінальную справу, распачатую па факце смерці ў вайсковай часці №25849 пад Барысавам салдата тэрміновай службы Арцёма Басцюка. 25-гадовы мінчук быў знойдзены павешаным 31 сакавіка 2017 года.
«Арцём любіў жыццё. Я вам не магу перадаць… Ён скончыў універсітэт, быў валанцёрам у Чырвоным крыжы, быў донарам. У яго не было шкодных звычак, — распавядае Еўрарадыё Таццяна Антонаўна, мама загінулага салдата. — Ён сказаў: я пайду і адслужу, каб не бегаць».
Служба ў арміі апраўдала найгоршыя чаканні Арцёма Басцюка. Ён распавядаў бацькам, што «дзяды» прымушалі «маладых» купляць ім каву, цукар, цыгарэты, не дазвалялі спаць. За невыкананне загаду прымушалі адціскацца сотні разоў. Хлопец не вытрымаў і стаў скардзіцца на нестатутныя ўзаемаадносіны.
30 сакавіка абмеркаваць сітуацыю ў частку прыязджалі бацькі хлопца. Камандзіры паабяцалі ім разабрацца. Але ўвечары таго ж дня салдат патэлефанаваў дадому, каб развітацца. Бацькі забілі трывогу і, у сваю чаргу, патэлефанавалі ў частку. Іх запэўнілі, што ўсё будзе добра, але раніцай Арцёма знайшлі ў пятлі.
Бацька і маці маладога чалавека знайшла адваката і дамаглася таго, каб іх прызналі пацярпелымі. Следчы камітэт пачаў крымінальную справу, але не за давядзенне да самагубства або за забойства, а па частцы 3 артыкула 443 Крымінальнага кодэкса Беларусі — парушэнне статутных правілаў узаемаадносін паміж вайскоўцамі, якое пацягнула цяжкія наступствы.
«Справа яшчэ ідзе, яна да канца не абагульненая. Праведзена 7 экспертыз, і эксперты нічога не могуць канкрэтна сказаць. Як у бабулі — напалам: можа так, а можа так, — распавядаў на мінулым тыдні Сяргей Аляксандравіч, бацька Арцёма. — І вось, яны павінны прыйсці да нейкай высновы: закрыць справу або працягнуць, па якіх артыкулах і г.д. Але, мяркуючы па ўсім, па нестатутных узаемаадносінах нічога не выяўлена».
12 кастрычніка бацькі Арцёма Басцюка атрымалі пастанову аб спыненні папярэдняга расследавання па крымінальнай справе.
«За адсутнасцю грамадска небяспечнага дзеяння, прадугледжанага крымінальным заканадаўствам, — зачытвае пастанову матуля загінулага салдата. — Гэта поўнае бязмежжа. Калі ён прыйшоў у частку, ён распавядаў, якія там жахі. Пасля таго, як у шпіталі паляжаў і выйшаў — казаў: усё, гэта немагчыма».
Адвакат Сяргея і Таццяны Басцюкоў падрыхтаваў і адправіў хадайніцтва: «З улікам абстаноўкі на месцы здарэння, выяўленых цялесных пашкоджанняў, асаблівасцяў странгуляцыйнай баразны [след ад вяроўкі на шыі загінулага] ці высветленыя нейкія аб'ектыўныя дадзеныя, што даказваюць ці выключаюць, што Басцюк Арцём здзейсніў павешанне самастойна, без старонняй дапамогі?». Аднак, па словах Таццяны Антонаўны, яно было пакінутае без адказу.
Сям'я Басцюкоў мае намер абскардзіць пастанову і дамагацца аднаўлення крымінальнай справы па факце смерці сына.
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма16
Усе беларускія банкі пачнуць сачыць за месцазнаходжаннем кліентаў? Альфа-банк ужо папярэдзіў, адмовіцца немагчыма
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу2020
Каментары