Як стала вядома «Нашай Ніве» ад вартых даверу крыніц,
у аўторак, 30 кастрычніка, па падазрэнні ў спробе дачы хабару для, папярэдне, урэгулявання будаўнічых пытанняў, сілавікі затрымалі бізнэсмена Аркадзя Ізраілевіча.
Сапраўды, Ізраілевіч апошні раз быў анлайн у месенджарах а 9-й раніцы аўторка, ягоны мабільны і хатні нумары маўчаць.
Мы звязаліся з адвакатам Ізраілевіча, Аленай Калазаевай. Тая не стала абвяргаць інфармацыю пра затрыманне, сказаўшы толькі, што «пакуль не гатова пра гэта гаварыць».
«Ежедневнік» ставіў Ізраілевіча на 98-е месца ў рэйтынгу самых паспяховых і ўплывовых бізнэсменаў краіны. Выданне пералічвала спіс яго актываў. Ізраілевіч займаўся інвестыцыямі ў нерухомасць (Вікторыя Плаза, Парк Плаза, жылыя дамы, Парк Авеню на беразе Свіслачы, праект бізнэс-цэнтра на Заслаўскай). Апроч таго, ён меў інтарэсы ў гандлі нафтапрадуктамі, а таксама быў датычны да асфальтабетоннага завода ў Мінску.
Пры гэтым Аркадзь Ізраілевіч паводзіў сябе нетыпова для беларускага бізнэсмена: у той час, як усе астатнія багатыя людзі намагаюцца з'яўляцца ў СМІ толькі пры пазітыўных нагодах, скандальныя ўчынкі Ізраілевіча грамадства абмяркоўвала ледзь не штомесяц.
Так, вядомасць яму надала ўскосная датычнасць да рэстарана «Паедзем-Паядзім» у Курапатах.
Ізраілевіч нават падаваў у суд на выданне «Новы час», аднак прайграў працэс.
Потым ён на відэа біўся з актывістамі «Курапацкай вахты», публічна радаваўся іх затрыманням.
Чытайце: Ізраілевіч патузаўся ля рэстарана ў Курапатах з пратэстоўцамі: «Там людзі стаяць за грошы»
Чытайце: Як бізнэсмен Ізраілевіч адрэагаваў на затрыманне Севярынца ФОТАФАКТ
Датычна рэпрэсаваных людзей у саміх Курапатах Ізраілевіч сказаў так: «Магчыма, там ляжаць тыя, каго і трэба было расстраляць».
Чытайце: Магчыма, у Курапатах ляжаць тыя, каго і трэба было расстраляць
Але асаблівы шал у людзей, нават ніяк не ангажаваных у курапацкае змаганне, Ізраілевіч выклікаў сваім учынкам у дачыненні да вядучага Юрыя Таболіна — гісторыі не мінула яшчэ і тыдня.
Сутнасць канфлікту, які адбыўся 27 кастрычніка ў Мінску, была ў тым, што дарагая машына Ізраілевіча была прыпаркаваная на месцы для інвалідаў. У выніку Таболін, які меў права стаяць на гэтым месцы, падпёр «Бэнтлі» Ізраілевіча.
Са словаў Таболіна, праз паўгадзіны яму пазванілі са словамі «прыбяры машыну, а то не будзе чаго прыбіраць», а потым яшчэ і аблаялі ў духу «не дарма цябе прырода абдзяліла».
Каб залагодзіць канфлікт, Ізраілевіч прапаноўваў Таболіну прыехаць да яго на офіс і ўзяць грошы, але той адмовіў.
Чытайце: Вядучы Юрый Таболін пра канфлікт на паркоўцы: Ізраілевіч прапаноўваў мне грошы — я адмовіўся
На момант публікацыі звязацца з сілавымі органамі магчымасці няма, інфармацыя будзе абноўлена.
Цяпер чытаюць
Як у галечы співалася радня Лукашэнкі? Малавядомыя факты20
Каментары