Выйшла шостая кіначастка Патэрыяны. Піша Андрэй Расінскі.
Гары Потэр і прынц-паўкроўка (Harry Potter and the Half-Blood Prince)
Вялікабрытанія – ЗША, 2009, каляровы, 153 хв.
Рэжысёр: Дэйвід Етс
Ролі выконваюць: Дэніэл Рэдкліф, Эма Ўотсан, Рупэрт Грын, Майкл Гэмбан, Алан Рыкман, Джым Бродбэнт, Хелена Бонэм-Картэр
Жанр: казачныя прыгоды паводле аднайменнай кнігі Джаан Роўлінг
Адзнака: 6 (з 10)
Гары Потэру, які працягвае навучанне ў чароўнае школе, трапляе ў рукі загадкавая кніга прынца-паўкроўкі. Разам з сябрамі і дырэктарам Дамблдорам ён спрабуе раскрыць сакрэты злога чараўніка Волан дэ Морта.
Шостая серыя Патэрыяны пастаўленая рэжысёрам Дэйвідам Йетсам у попельна-шэрых танах. Кожная новая новая кніга Джаан Роўлінг станавілася ўсё змрачнейшай – і экранізацыя адлюстроўвае змену атмасферы. Зло ірвецца на вуліцы Лондана, людзі зляканыя, над школай завісаюць цёмныя хмары-знакі.
Многія сцэны – з праклёнамі і падводнымі мерцвякамі – нагадваюць хорары, так што стужка мае ўзроставыя абмежаванні – прагляд дзецям толькі з дарослымі. Але галоўныя бойкі разгортваюцца ў сэрцах герояў, прыходзіць каханне – і знята гэта з выключнай цнатлівасцю, як і мае быць у казцы.
Герміёна ладзіць сцэны рэўнасці, Гары баіцца прызнацца ў любові да Джыні, а Рон стаецца ахвярай пацешна-навязлівай дзявулі й труціцца любоўнымі зёлкамі. Гэта звычайныя падлеткі – са сваімі радасцямі й праблемамі – у пабытова-чароўных абставінах.
А за акном згушчаецца цемра, чарнільныя кроплі ўспамінаў – выдатная візуальная вынаходка! – ствараюць карціны жыцця з нянавісцю ў сэрцы, набліжаюцца цяжкія часы.
І толькі людзкая салідарнасць здольная разагнаць змрок.
Вас чакаюць новыя выпрабаванні – і прыгоды з «Дарамі Смерці».
Дзядок расказаў, як паводзіў бы сябе ў сённяшняй Беларусі і што будзе далей5
Каментары