«Гомельтранснафта» на трое сутак абмежавала прапампоўку нафты. Што адбываецца?
«Гомельтранснафта» на трое сутак абмежавала прапампоўку нафты па нафтаправодзе «Дружба» ў напрамку Польшчы праз «пазапланавы рамонт» на адной з ветак трубаправода. Гэта адбылося на фоне пагрозаў Лукашэнкі пра магчымае перакрыццё газу, калі Еўропа ўвядзе новыя санкцыі. Няўжо дайшло і да нафты? Спрабуем разабрацца.
«Гомельтрнаснафта»: Абмежаванне прапампоўкі нафты па «Дружбе» з палітыкай не звязанае
Нафтаправод «Дружба» забяспечвае пастаўкі нафты на беларускія НПЗ і яе транзіт у Еўропу. Трубаправод бярэ свой пачатак у Самарскай вобласці, праходзіць праз Бранск, далей дзеліцца на паўночны і паўднёвы ўчастак, праходзіць праз Беларусь, Украіну, Польшчу, Чэхію, Славакію, Германію, Венгрыю, Латвію і Літву.
На афіцыйным сайце «Гомельтрнаснафта» ні пра якія праблемы наогул не згадваецца. Навінаў на тэму прыпынення прапампоўкі нафты ў бок Польшчы, як і афіцыйных каментарыяў на гэты конт, пакуль няма.
Мы датэлефанаваліся ў прыёмную «Гомельтрнаснафты», што займаецца перапампоўкай нафты з расійскай часткі нафтаправода «Дружба» ў напрамку краін Заходняй і Усходняй Еўропы і забяспечвае вуглевадароднай сыравінай беларускую нафтахімію.
«Абмежаванне прапампоўкі нафты па «Дружбе» з палітыкай не звязанае. На адным з участкаў нафтаправода пачаліся пазапланавыя рамонтныя работы», — пракаментавалі на прадпрыемстве.
«НН»: «Яшчэ якія-небудзь краіны, акрамя Польшчы, з-за рамонту нафтаправода цяпер нафту недаатрымліваюць»?
«Прапампоўка абмежаваная толькі ў кірунку польскай Адамавай Заставы. Пакуль што на трое сутак», — адказаў нам суразмоўца.
«НН»: «Пасля заканчэння рамонту патрэбны аб’ём нафты ў Польшчу прыйдзе»?
«План месяца не пераглядаўся. Больш сказаць няма чаго», — дадаў прадстаўнік «Гомельтрнаснафты» і паклаў трубку.
Эксперт: «Выглядае, гэта такі сігнал на фоне крызісу, што ў Беларусі, як транзіцёра, ёсць рычагі ўплыву на Польшчу»
«Увогуле, такія выпадкі, якія вымагаюць рамонту, здараюцца. Але, яшчэ няма ніякай інфармацыі, што ж там адбылася за аварыя, прычына не названая, і не ясна — мы маем справу з тэхнагеннай ці палітычнай з'явай.
Выглядае, гэта такі сігнал на фоне крызісу, што ў Беларусі, як транзіцёра, ёсць рычагі ўплыву на Польшчу.
Але, мы ж пастаўляем не сваю нафту, а чужую, пастаўкі гарантаваныя кантрактамі паміж Польшчай і Расіяй, Беларуссю і Расіяй.
Калі яны будуць сарваныя, то ўзнікнуць юрыдычныя праблемы ў беларускага аператара і расійскага пастаўшчыка, у той час як палякі у выпадку захавання сітуацыі спынення паставак маюць альтэрнатыўныя шляхі.
Калі з Расіі пайшла «брудная нафта» па беларускай трубе, то Польшча павялічыла пастаўкі праз Гданьск, куды таксама можа пастаўляцца і расійская, і паўночная нафта. Аб спыненні заводаў у Польшчы гаворка не ідзе», — сказала эксперт Таццяна Манёнак.
***
Нагадаем, зносіны Беларусі і Польшчы пагоршыліся з-за міграцыйнага крызісу, які абвастрыўся ў лістападзе. На мяжы дзвюх краін цяпер знаходзяцца некалькі тысяч бежанцаў, якія праз тэрыторыю Беларусі намагаюццаа патрапіць у Еўрасаюз.
Учора, 16 лістапада, група мігрантаў паспрабавала прарвацца праз пункт пропуску «Брузгі», польскія сілавікі ўжылі супраць іх вадамёты і слёзатачывы газ.
Краіны ЕЗ рыхтуюць чарговы пакет санкцый супраць беларускіх уладаў, Мінск пагражае ў адказ перакрыць транзіт газу па трубаправодзе «Ямал-Еўропа».
Чытайце таксама:
Што будзе з беларускай эканомікай, калі Польшча закрые мяжу, а Лукашэнка — транзіт газу?
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж21
Каментары