Ці вартая ахвяраў прынцыповасць ДАІ? Самыя гучныя выпадкі гібелі ў выніку аўтапагоняў

Пакуль ДАІ разбіралася з кіроўцам, п’яны ўласнік BMW сеў за руль — загінуў пасажыр таксі

Сакавік 2011 года. Ноччу ў цэнтры Мінска сутыкнуліся BMW і Volkswagen. Апошні аўтамабіль выкарыстоўваўся як таксі. У момант здарэння там знаходзіўся 19-гадовы пасажыр, які не быў прышпілены рамянём бяспекі. Ад удару юнак выляцеў з салона і загінуў.

Як паведамляла ДАІ, кіроўца BMW праехаў на чырвонае святло. У момант здарэння ён быў п’яны — у мужчыны выявілі каля двух праміле алкаголю.

Падалося, пасля ДТЗ віноўнік нават не разумеў, што адбылося. Яго адказы на пытанні, зафіксаваныя на відэа, выглядалі неадэкватнымі сітуацыі. У прыватнасці, ён сцвярджаў, што не бачыў, на якое святло праехаў.

Павялічыць

Самае дзіўнае, што за некалькі хвілін гэты BMW спынілі на плошчы Перамогі (у квартале ад месца здарэння). За рулём знаходзілася жанчына. Пры сабе ў яе не было пасведчання кіроўцы, і супрацоўнікі ДАІ прапанавалі прайсці ў службовы аўтамабіль.

У гэты час уласнік машыны знаходзіўся ў салоне BMW. Кажуць, што падыходзіў да інспектараў, нешта пытаўся, а потым сеў за руль і даў па газах. За ім адразу ж паехаў аўтамабіль ДАІ, але седан спыніць не паспелі.

Гэты выпадак здарыўся не ў выніку пераследу, але мае прамое дачыненне да дзеянняў міліцыі. Вось лагічныя пытанні, якія паўстаюць: чаму відавочна п’яны чалавек застаўся ў аўтамабілі без кантролю? Як здарылася, што ён меў доступ да ключа запальвання? 

Кіроўца BMW быў асуджаны амаль на пяць год зняволення. Яго таксама пазбавілі на такі ж тэрмін пасведчання кіроўцы. 

Імкнуўся з’ехаць ад патруля і ўрэзаўся ў слуп

Амаль усе пагоні пачынаюцца з тыповай сітуацыі: кіроўца ігнаруе сігналы ДАІ і імкнецца з’ехаць. У дадзеным выпадку нават ёсць відэазапіс падзеяў з самага пачатку.

Справа адбывалася ў Мінску ў 2018-м. Бачна, як кіроўца Opel спачатку спрабуе падмануць, накіроўваючыся ў скразны двор, а пасля набірае хуткасць, часам праскокваючы на чырвонае святло і выязджаючы на «сустрэчку».

На вуліцы Даўгабродская ён зрабіў памылку, дапусціўшчы занос — аўтамабіль урэзаўся ў слуп. Кіроўца загінуў на месцы здарэння (пазней у яго знайшлі алкаголь).

У салоне знаходзілася кампанія юнакоў, якія атрымалі траўмы і былі дастаўленыя ў бальніцу. Яны сцвярджалі, што пазнаёміліся з уласнікам аўтамабіля за некалькі гадзін да ДТЗ.

Здавалася б, справа не патрабуе абмеркавання, аднак у выніку ўласнай памылкі загінуў малады чалавек. Сям’я, сябры страцілі блізкага, які мог бы прыносіць карысць грамадству.

З аднаго боку, пакідаць без увагі ігнараванне сігналаў ДАІ няправільна. З другага — ці варта міліцэйская прынцыповасць такога выніку? А што, калі б кіроўца проста з’ехаў? Што дае прэсінг чалавека, які гатовы груба парушаць правілы дарожнага руху? У чым мэтазгоднасць?

На гэтыя пытанні цяжка знайсці адназначныя адказы. Але некаторыя спецыялісты ў галіне бяспекі дарожнага руху лічаць: часам лепш кіроўцу адпусціць, чым правакаваць цяжкія наступствы. Аднак у той жа час выпрацаваць механізм прыцягвання да адказнасці, калі яго можна выклікаць на размову ў спакойных абставінах.

Зразумела, што гаворка ідзе пра лібералізацыю, якую зараз уявіць амаль немагчыма. Але ж прыйдзе час…

Па словах сведкаў, хлопец на Mitsubishi рэзка пачаў рух, а пасля трапіў у ДТЗ

Яшчэ адна падобная сітуацыя. Восенню 2017-га года Mitsubishi ўрэзаўся ў слуп на праспекце Дзяржынскага ў Мінску. Удар быў такі моцны, што асвятляльная мачта ўпала, а аўтамабіль загарэўся. Малады кіроўца загінуў на месцы здарэння.

Па словах сведкаў, да гэтага аўтамабіль спынілі супрацоўнікі міліцыі, але кіроўца адмовіўся выходзіць з салона і рэзка пачаў рух.

У ДАІ ж пацвердзілі, што Mitsubishi праехаў на забаронены сігнал светлафора, на што звярнулі ўвагу дзяжурныя ППС.

Павялічыць

Зараз ужо цяжка сказаць, што менавіта справакавала хлопца на небяспечныя дзеянні. Аднак гэта здарэнне зноў узняло ў грамадстве пытанне аб алгарытме дзеянняў пры спыненні аўтамабіля з патэнцыйным парушальнікам ПДР.

У многіх краінах Захаду кіроўца пасля спынення паліцыяй павінен заглушыць рухавік і пакласці рукі на руль. Механізм дзеянняў у такіх выпадках у Беларусі дагэтуль дэталёва не апісаны.

Кіроўца, якога пераследавалі, загінуў, яшчэ два чалавекі пацярпелі

Большасць пераследаў з трагічнымі вынікамі адбываецца ў буйных гарадах. Дакладней, пра іх часцей становіцца вядома. Бо ёсць падазрэнні, што інфармацыя аб некаторых выпадках не трапляе ў публічную прастору. А вось здарэнне, пра якое пойдзе гаворка ніжэй, было зафіксавана ў Ваўкавыску ў 2015-м годзе і атрымала вялікі рэзананс.

Павялічыць

Днём экіпаж ДАІ атрымаў паведамленне, нібыта кіроўца Kia можа знаходзіцца ў алкагольным стане. Спробы спыніць аўтамабіль ні да чаго не прывялі: мужчына, які знаходзіўся за рулём красовера, ігнараваў заклікі праз гучнагаварыцель і іншыя сігналы.

На адным з перакрыжаванняў Kia сутыкнуўся з BMW. Седан адкінула ў бок і ён урэзаўся ў прыватны дом, праламаўшы плот. Кіроўца красовера загінуў. А два чалавекі з BMW пацярпелі і былі дастаўленыя ў бальніцу.

Слушная заўвага наконт таго, што п’яны кіроўца — гэта апрыёры небяспека. Так, але ж пераслед у горадзе наўрад ці мінімізуе рызыку. Наадварот! Падчас пагоні абодва бакі знаходзяцца ў няпростым эмацыйным стане. Верагоднасць памылкі павялічваецца ў некалькі разоў. А для кіроўцы, якога пераследуюць, падчас пагоні як бы здымаюцца ўсе ўмоўнасці ў выглядзе ПДР, калі ён ужо вырашыў не спыняцца.

Ахвярай стаў супрацоўнік ДАІ

Часам здараецца так, што ахвярамі аўтааварыяў, якія здараюцца падчас пагоні, становяцца самі супрацоўнікі ДАІ. Такі выпадак быў зафіксаваны ў 2018-м годзе ў Гомелі.

Двое інспектараў ДПС патрулявалі на службовых матацыклах. Яны заўважылі байк маркі Honda без рэгістрацыйнага нумару і пачалі пераслед. Кіроўца не спыніўся, а толькі паскорыўся.

Падчас пагоні адзін з супрацоўнікаў ДАІ сутыкнуўся з Nissan. Аўтамабіль рухаўся ў тым жа напрамку і выконваў разварот. Пасля ўдару службовы матацыкл загарэўся. Інспектара шпіталізавалі, але ён памёр у рэанімацыі.

Матацыкліста на Honda у хуткім часе знайшлі. Па факце здарэння была распачата крымінальная справа.

Зразумела, што гэта прафесійная рызыка для супрацоўніка ДАІ, але пытанне тое ж: ці варта было спыняць парушальніка ПДР такой цаной?

Дзяржаўная газета размесціла тэндар на куплю аўто. Выглядае так, што заяўка напісана пад канкрэтны красовер

Мінчук пакатаў сябра на самакаце, той упаў і памёр. Цяпер самакатчыку пагражае да трох год калоніі

У брусельскім метро мужчына свядома штурхнуў жанчыну пад колы цягніка. Выратавала рэакцыя машыніста

• 0
• 0
• 0
• 0
• 0
• 0
• 0
• 0