На агульных выбарах, якія адбудуцца ў Нямеччыне 28 верасня, мае пайсці палітычная партыя, чыя галоўная мэта — аднавіць берлінскі мур. Ідэя такая: скасаваць дзяленне на раёны ва Ўсходнім Бэрліне і зрабіць новую адміністрацыйную адзінку — Остлянд (Усходняя зямля). Остлянд будзе свабоднай эканамічнай зонай, якая атрымае значныя падатковыя палёгкі, дзе створыцца спрыяльны інвэстыцыйны клімат. І менавіта, каб адасабіць тую зону ад астатняй Нямеччыны, так цвердзяць у той партыі, і варта пабудаваць мур пасярод Берліну нанава.
Партыя-прыхільніца аднаўлення легендарнага мура называецца проста Партыяй (па-нямецку Die Partei). Гэтая назва напрасткі адсылае да таталітарнага перыяду нямецкай гісторыі, калі існавала аднапартыйная сыстэма: да фашыстоўскай Германіі (час кіравання Нацыянал-Сацыялістычнай Рабочай партыі) і да ГДР, дзе бязмежна панавала Сацыялістычная Адзіная партыя.
Але досыць негатыву — фарбы можна было б згушчаць і далей, аднак варта прызнацца: партыя «Партыя» была арганізаваная не кім іншым, як галоўным рэдактарам сатырычнага часопіса «Тытанік» Мартынам Занеборнам і дарма што яна афіцыйна зарэгістраваная, але ўяўляе сабой хутчэй такі сабе піяр-ход з мэтай папулярызацыі выдання, чым рэальны палітычны рух.
Акрамя адбудовы берлінскага мура, чальцы абяцаюць, што калі яны трапяць у Рэйхстаг, дык кожнаму грамадзяніну выдадуць па дармавому шэзлонгу, а таксама скасуюцца падаткі на абутак з абцасамі (каб немцы выглядалі высокімі і загарэлымі).
Нягледзячы на перабольшаны папулізм, які мяжую з несхаванай іроніяй, варта зацеміць, што «Партыя» квітнее ўжо 5 гадоў, маючы ў сваіх шэрагах 8 тысячаў сяброў, а таксама філіялы па ўсё краіне. У 2005 годзе за іх прагаласавала каля 10 тысяч чалавек (0.022% ад агульнай колькасці нямецкіх выбарцаў) .
Актывісты «Партыі» ўжо аднавілі невялікі, сімвалічны, ўчастак муру, хіба без мінных палёў, ланцужныж сабакаў і лёгкіх на спуск курка ахоўнікаў, якія падчас халоднай вайны пільнавалі мяжу паміж Усходнім і Заходнім Берлінамі.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары