Да пяці гадоў калоніі. За спробу эвакуацыі з Беларусі асудзілі былога мытніка, студэнта і нядаўнюю школьніцу
За гэтай спробай эвакуацыі сачылі спецслужбы. Тое, як нядаўняя выпускніца школы спрабавала перасекчы мяжу, здымалі адразу на некалькі камер з зямлі і паветра.
У Гродзенскім абласным судзе 5 красавіка вынеслі прысуд былому мытніку Мікалаю Куляшову, Аніце Бакуновіч і студэнту Ягору Курзіну, паведамляе «Вясна». Іх абвінавацілі ў «замаху на незаконнае перасячэнне мяжы», «удзеле ў экстрэмісцкім фармаванні» (пад гэтым мелі на ўвазе арганізацыю «Дапамога»), а таксама па шэрагу іншых артыкулаў Крымінальнага кодэкса.
Суддзя Віктар Сянько прызначыў Мікалаю Куляшову пяць гадоў калоніі, Аніце Бакуновіч — тры з паловай гады зняволення, Ягору Курзіну — тры гады калоніі.
Першы раз тады яшчэ 18-гадовую Аніту Бакуновіч затрымалі 23 лютага 2022 года. Праз чатыры месяцы дзяўчыну асудзілі да двух гадоў «хатняй хіміі» па «народным» артыкуле 342 Крымінальнага кодэкса. Пасля абвяшчэння прысуду яе вызвалілі з-пад варты.
Другі раз Аніту затрымалі 21 верасня 2022 года на Гродзеншчыне пры перасячэнні беларуска-літоўскай мяжы. На дзяржаўных каналах выйшаў фільм, у якім паказалі момант спробы 19-гадовай палітзняволенай нелегальна перасекчы мяжу. Дзеянні дзяўчыны здымала адразу некалькі камер — з зямлі і паветра.
Аніту Бакуновіч асудзілі па двух артыкулах Крымінальнага кодэкса: ч. 3 арт. 361-1 (удзел у экстрэмісцкім фармаванні) і ч. 1 арт. 14 і ч. 3 арт. 371 (замах на незаконнае перасячэнне мяжы).
Былога мытніка і актывіста Беларускай сацыял-дэмакратычнай партыі «Грамада» Мікалая Куляшова затрымалі ў верасні 2022 года. У фільме АНТ Мікалая Куляшова называлі «правадыром» для палітвязняў пры перасячэнні беларуска-літоўскай мяжы. Таксама гаворыцца, што ён супрацоўнічаў з некамерцыйнай арганізацыяй «Дапамога», якая дзейнічае ў Літве і дапамагае палітычным уцекачам. «Дапамога» была прызнана «экстрэмісцкім фармаваннем» па рашэнні КДБ 12 кастрычніка 2022 года.
Мікалая судзілі паводле чатырох артыкулаў Крымінальнага кодэкса: ч. 1 арт. 14 і ч. 3 арт. 371 (замах на наўмыснае незаконнае перасячэнне дзяржаўнай мяжы, здзейснены арганізаванай групай), ч. 3 арт. 361-1 КК (удзел у экстрэмісцкім фармаванні), арт. 378 (крадзеж асабістых дакументаў) і ч. 1 арт. 14 і ч. 2 арт. 380 (замах на падробку і выраб або збыт падробленых дакументаў).
За «замах на незаконнае перасячэнне мяжы» паводле ч. 1 арт. 14 і ч. 3 арт. 371 і «ўхіленне ад мерапрыемстваў прызыву на вайсковую службу» паводле ч. 1 арт. 435 КК асудзілі 21-гадовага Ягора Курзіна. У прапагандысцкім фільме АНТ Курзін кажа, што год вучыўся ў БДУІР і быў адлічаны за непаспяховасць. У сюжэце АНТ гаворыцца, што ён нібыта, каб не ісці ў войска, выдумаў гісторыю пра палітычны пераслед. У сюжэце гаворыцца, што Курзін звярнуўся ў «Дапамогу».
Па дзяржканалах паказалі, як палітзняволеная спрабавала перайсці мяжу з Літвой
«Бачыла акрываўленую шкарпэтку». Як за кратамі аказалася нядаўняя выпускніца школы
Былога мытніка вінавацяць у тым, што дапамагаў беларусам бегчы праз мяжу
Цяпер чытаюць
Былога беларускага палітвязня судзяць у Літве за падрыхтоўку да забойству расійскага апазіцыянера. Пагражае аж да пажыццёвага1
Каментары