Гомельскага галоўнага памежніка, адказнага за напад на Украіну, абвінавачваюць па рэдкай крымінальнай справе
У судзе Савецкага раёна Гомеля будзе разглядацца крымінальная справа ў дачыненні да поўнага цёзкі начальніка Гомельскай пагранічнай групы палкоўніка Уладзіслава Бруева. Яго абвінавачваюць па частцы 1 артыкула 178 Крымінальнага кодэкса Беларусі — «разгалошванне медычнай таямніцы», заўважыў «Флагшток».
Нягледзячы на такое рэдкае і нехарактэрнае для вайскоўца абвінавачанне, «Флагшток» мяркуе, што перад судом сапраўды паўстаў начальнік Гомельскай памежнай групы.
На гэта паказвае тое, што другі абвінавачаны па справе — Аляксандр Войнаў. Паводле інфармацыі «Флагштока», падпалкоўнік Войнаў зʼяўляецца начальнікам аддзела кадраў Гомельскай пагранічнай групы.
Поўнае абвінавачанне ў КК гучыць так: «Наўмыснае разгалашэнне медыцынскім, фармацэўтычным або іншым работнікам без прафесійнай або службовай неабходнасці звестак аб наяўнасці захворвання, дыягназе або выніках медыцынскага агляду пацыента».
Абвінавачаным пагражае штраф або пазбаўленне права займаць пэўныя пасады або займацца пэўнай дзейнасцю.
У чым сутнасць справы, невядома.
Раней Бруеў часта выступаў у дзяржаўнай прэсе. У ліпені 2023 года яму прысудзілі званне «Чалавек года» ў намінацыі «Служу Айчыне». Апошняе ягонае публічнае зʼяўленне зафіксавана 14 кастрычніка 2023 года.
Паводле інфармацыі сайта Дзяржпагранкамітэта, Бруеў сёння працягвае лічыцца начальнікам Гомельскай пагранічнай групы.
Уладзіслаў Бруеў — адзін з тых, хто нясе адказнасць за ўзброенае ўварванне ва Украіну расійскіх войскаў з тэрыторыі Гомельскай вобласці.
З гэтай прычыны ён уключаны ў санкцыйны спіс Украіны, Еўразвяза, Швейцарыі, Вялікабрытаніі, Канады, Новай Зеландыі.
Цяпер чытаюць
Зяленскі: Рэтранслятары на мяжы Беларусі прыпынілі працу69
Каментары
Пародыя на пародыю.