А ў дзяржустановах работнікам могуць забараніць наведваць інфармацыйныя сайты.
У Беларусі абмежаванне доступу грамадзян на пэўныя інтэрнет‑рэсурсы будзе ажыццяўляцца правайдэрамі толькі паводле заяў саміх карыстальнікаў.
Пра гэта 5 лютага на прэс‑канферэнцыі ў Мінску паведаміў міністр сувязі і інфарматызацыі Мікалай Панцялей, каментуючы новаўвядзенні, прадугледжаныя ўказам прэзідэнта № 60 «Аб мерах па ўдасканальванні выкарыстання нацыянальнага сегмента сеткі Інтэрнет».
«Гэта значыць кожны карыстальнік мае права звярнуцца да свайго аператара доступу і папрасіць абмежаваць доступ да тых ці іншых сайтаў.
Гэта будзе вырашацца тэхнічнымі сродкамі кожным канкрэтным аператарам», — падкрэсліў міністр. Паводле яго слоў, такім метадам можа быць рэалізавана функцыя кантролю з боку бацькоў за дзецьмі.
«Гэта значыць, што канкрэтны грамадзянін звяртаецца да свайго інтэрнет‑правайдэра і просіць, каб аператар прыняў меры да таго, каб з яго персанальнага камп’ютэра было немагчыма трапіць на некаторыя канкрэтныя сайты. Гэта не азначае нейкіх збораў подпісаў грамадзянамі і іншых грамадскіх дзеянняў — усё індывідуальна», — растлумачыў Мікалай Панцялей.
Разам з тым, паводле яго слоў, прадугледжана ўвядзенне абмежаванняў доступу да інтэрнет‑рэсурсаў у адносінах да дзяржаўных органаў і арганізацый. »У гэтым выпадку рашэнні будуць прымацца органамі дзяржкіравання —
у чым канкрэтна абмяжоўваць работнікаў дзяржаўных органаў і арганізацый, якія ў працоўны час павінны займацца сваімі службовымі абавязкамі і якім, напэўна, не трэба ў працоўны час звяртацца да пэўных інфармацыйных рэсурсаў», — сказаў міністр.
Мікалай Панцялей таксама паведаміў, што ў адпаведнасці з указам карыстальнікі інтэрнет‑паслуг у калектыўных пунктах доступу будуць паказваць пашпарт для ідэнтыфікацыі.
«Як я разумею, карыстальнікам інтэрнет‑паслуг у інтэрнет‑клубах давядзецца паказваць дакумент, які сведчыць асобу,таму што ўказ прадугледжвае для інтэрнет‑клубаў ідэнтыфікацыю не абаненцкай прылады, а персаналіі», — сказаў кіраўнік Мінсувязі.
Каментары