З верасня 2024 года беларускае прадпрыемства падало ў расійскія суды больш за 20 пазоваў.
БелАЗ масава падае пазовы да расійскіх індывідуальных прадпрымальнікаў і кампаній. Сутнасць усіх пазоваў прыкладна аднолькавая. БелАЗ спрабуе спагнаць кампенсацыю за парушэнне выключных правоў на таварны знак, піша Office Life.
Часцей за ўсё гаворка ідзе пра іпэшнікаў і юрыдычных асоб, якія прадавалі на маркетплэйсах розныя тавары пад брэндам БелАЗ. Напрыклад, калекцыйныя мадэлі самазвалаў, «якія валодаюць прыкметамі кантрафактнасці», бірулькі, магнітныя пазлы на халадзільнік і многае іншае.
У чэрвені 2022 года калегія Федэральнай службы па інтэлектуальнай уласнасці Расіі прызнала слоўныя абазначэнні «БелАЗ» і BELAZ агульнавядомымі таварнымі знакамі. Такія знакі падлягаюць асаблівай абароне з боку дзяржавы.
Звычайна, БелАЗ патрабуе кампенсацыі ў 50 тысяч расійскіх рублёў (крыху больш за 500 даляраў). Таксама ў пазовах беларускае прадпрыемства просіць спагнаць з ІП і юрыдычных асоб паштовыя выдаткі і выдаткі па аплаце дзяржпошліны за падачу пазову.
Частка спраў разглядаецца ў парадку спрошчанай вытворчасці, то-бок рашэнне па справе прымаецца аднаасобна суддзёй без выкліку бакоў у суд.
У выпадку з індывідуальнымі прадпрымальнікамі суд, як правіла, часткова задавальняе патрабаванні БелАЗа і спаганяе з ІП ад 10 да 25 тысяч расійскіх рублёў (ад 100 да 250 даляраў), а таксама памер дзяржпошліны і паштовыя выдаткі. Зрэшты, часам суд і зусім спыняе разгляд справы, паколькі бакі заключаюць міравое пагадненне.
Што тычыцца юрыдычных асоб, то суд часцей за ўсё цалкам задавальняе патрабаванні беларускага прадпрыемства.
Цяпер чытаюць
«Дагэтуль задаюся пытаннем, чым Пратасевіч мяне зачараваў». Вялікае інтэрв'ю Соф'і Сапегі — частка другая8
Каментары