Кітайскія даследчыкі прадэманстравалі дрон памерам з камара
Новая распрацоўка дапаможа правядзенню сакрэтных і баявых аперацый.
Пра новую распрацоўку лабараторыі робататэхнікі ў Нацыянальным універсітэце абаронных тэхналогій (NUDT) у кітайскай правінцыі Хунань паведамляе South China Morning Post.
Даследчыкі прадэманстравалі новы беспілотнік памерам з камара. Ён добра падыходзіць для разведкі і выканання іншых спецыяльных баявых задач. Гэта чарговы прыклад таго, як нанатэхналогіі і біёніка імкліва ўваходзяць у сферу вайсковай прамысловасці.
На відэа бачна, што беспілотнік мае два малюсенькія крылы з лістападобнай структурай, якія прымацаваныя да бакоў палачкападобнага корпуса, а таксама тры тонкія, як валасы, «ножкі».
Акрамя гэтай мадэлі, вучоныя прадэманстравалі мадэль іншага беспілотніка, які мае чатыры крылцы, два з якіх рухаюцца гарызантальна па абодва бакі корпуса. Кіраванне адбываецца з дапамогай смартфона.
Стварэнне такіх дронаў — складаная інжынерная задача. Усе ключавыя кампаненты — сенсары, акумулятары, схемы кіравання — павінны змясціцца ў мініяцюрным корпусе. Гэта патрабуе спалучэння розных галін навукі: мікрапрыборабудавання, матэрыялазнаўства, біёнікі.
Выданне адзначае, што распрацоўка кітайскіх інжынераў не першая ў сваёй галіне. Некаторыя краіны таксама маюць падобныя дроны. Напрыклад, дрон Black Hornet, створаны ў Нарвегіі, ужо актыўна выкарыстоўваецца арміямі па ўсім свеце. Ён змяшчаецца на далоні, а кіруецца праз ручны пульт. Яго камера і сенсары дазваляюць разведчыкам бяспечна назіраць за тэрыторыяй. Аднак ён істотна большы па памерах за кітайскую распрацоўку.
У 2021 годзе ВПС ЗША пацвердзілі распрацоўку ўласных мініяцюрных беспілотнікаў, але далейшых навін аб якіх-небудзь гатовых тэхналогіях або іх разгортванні не было.
Аўтары адзначаюць, што мікраробататэхніка знаходзіць прымяненне не толькі ў ваеннай сферы. Навукоўцы даследуюць магчымасці медыцынскіх мікро– і нанаробатаў для дыягностыкі, хірургіі, дакладнай дастаўкі лекаў і нават для візуалізацыі ўнутраных органаў.
Нягледзячы на поспехі, галіна ўсё яшчэ сутыкаецца з тэхнічнымі абмежаваннямі. Дроны патрабуюць надзейных крыніц сілкавання, устойлівасці да вонкавых умоў і эфектыўных сістэм сувязі. Адначасова з гэтым яны павінны заставацца маленькімі, лёгкімі і незаўважнымі. Гэта спрыяе росту інвестыцый у новыя матэрыялы, нанапрылады і штучны інтэлект.
Цяпер чытаюць
Рэдкі выпадак: памілаваны беларускі палітвязень пайшоў на вайну супраць Украіны16
Рэдкі выпадак: памілаваны беларускі палітвязень пайшоў на вайну супраць Украіны
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары