N.R.M. стварыў песню «Аўтарадыё» 2

Першае выкананне адбылося на «Рок-каранацыі».

Песню музыканты выканалі разам з праграмным дырэктарам радыёстанцыі «Аўтарадыё» Ірынай Львовай. Яна напісана ў знак салідарнасці з супрацоўнікамі радыёстанцыі, вяшчанне якой было спынена ў студзені 2010 года.

Гітарыст і вакаліст калектыву Піт Паўлаў паведаміў, што хутка кампазіцыя «Аўтарадыё» з’явіцца ў інтэрнэце. У сваю чаргу Ірына Львова выказала падзяку ўсім слухачам, якія ў цяжкі момант падтрымалі супрацоўнікаў радыёстанцыі.

Нагадаем, вяшчанне мінскай радыёстанцыі «Аўтарадыё» было спынена 12 студзеня па рашэнні Рэспубліканскай камісіі па тэлебачанні і радыёвяшчанні. Згодна з афіцыйнай фармулёўкай, прычынай стала распаўсюджванне ў эфіры радыёстанцыі інфармацыі, «якая змяшчае публічныя заклікі да экстрэмісцкай дзейнасці». Аналагічная прычына была ўказана ў папярэджанні Міністэрства інфармацыі. Цяпер іск радыёстанцыі да Міністэрства інфармацыі разглядаецца ў Вышэйшым гаспадарчым судзе.

Падчас «Рок-каранацыі» гледачы апладысментамі ўшанавалі памяць «Рок-князёўны — 2007» Вольгі Самусік, якая памерла 7 снежня 2010 года, роўна за месяц да свайго 26-годдзя, ад пнеўманіі. Яна была вакалісткай гуртоў «Тарпач», Zygimont Vaza, Hasta La Fillsta.

На фестывалі таксама ўшанавалі памяць паэтэсы і журналісткі Таццяны Сапач, якая трагічна загінула ў аўтакатастрофе ў ноч на 28 снежня 2010 года.

Таццяна Дарашчонак, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ