«У апошнія два гады Міністэрства адукацыі мэтанакіравана выціскае беларускую мову і беларускую літаратуру з вучэбнага і выхаваўчага працэсу», — кажа старшыня абласной арганізацыі ТБМ Іосіф Навумчык.
«У апошнія два гады Міністэрства адукацыі мэтанакіравана выціскае беларускую мову і беларускую літаратуру з вучэбнага і выхаваўчага працэсу, — сказаў І.Навумчык. — Як стала вядома са СМІ, Міністэрства адукацыі, а таксама Саюз пісьменнікаў Беларусі вырашаюць пазбавіць навучэнцаў магчымасці ў дастатковай ступені знаёміцца з творчасцю народных пісьменнікаў і паэтаў Янкі Купалы, Васіля Быкава, Рыгора Барадуліна, Ніла Гілевіча, такіх вядомых беларускіх літаратараў, як Генадзь Бураўкін, Святлана Алексіевіч, Вольга Іпатава, Сяргей Законнікаў, Уладзімір Някляеў, Уладзімір Арлоў, Вітаўт Чаропка, Міхась Скобла і іншых».
Як ён патлумачыў, у сувязі з гэтым абласная арганізацыя ТБМ вырашыла выказаць свой пратэст, прыняўшы адпаведную заяву.
«Віцебская абласная рада грамадскага аб’яднання «Таварыства беларускай мовы імя Францішка Скарыны» абурана такімі дзікунскімі дзеяннямі Міністэрства адукацыі і Саюза пісьменнікаў Беларусі ў адносінах да набыткаў беларускай літаратуры і яе знакамітых творцаў. Мы патрабуем спыніць шалёны наступ на беларускую мову, беларускую літаратуру. Мы выказваем недавер кіраўніцтву Міністэрства адукацыі Беларусі і патрабуем адстаўкі міністра Аляксандра Радзькова. Заклікаем беларускую грамадскасць і арганізацыі ТБМ падтрымаць нашу заяву», — гаворыцца ў дакуменце.
Акрамя таго, абласная арганізацыя ТБМ настойвае «вярнуць у сярэднія спецыяльныя і вышэйшыя навучальныя ўстановы краіны курс «Беларусазнаўства»; аднавіць выкладанне гісторыі і геаграфіі Беларусі на беларускай мове ў школах з рускай мовай навучання; вярнуць у адукацыйныя стандарты для ўсіх ВНУ абавязковае выкладанне курса «Беларуская мова: прафесійная лексіка»; адмяніць забарону на афіцыйныя сустрэчы з пісьменнікамі, членамі Саюза беларускіх пісьменнікаў ва ўстановах культуры і адукацыі».
Паводле слоў І.Навумчыка, тэкст заявы накіраваны ў Міністэрства адукацыі, Савет міністраў, Адміністрацыю прэзідэнта Беларусі, ГА «Саюз пісьменнікаў Беларусі», а таксама ў сродкі масавай інфармацыі.
Фота Андрэя Лянкевіча
Каментары