Пад Навагрудкам разбіўся вайсковы самалёт. Пілот загінуў

Глядзі таксама: Гісторыя авіякатастроф беларускай вайсковай авіяцыі

Сёння пры выкананні планавых палётаў у раёне авіяцыйнага палігона ў Навагрудскім раёне адбылося крушэнне самалёта Су-25116-й штурмавой авіяцыйнай базы. «Падчас палёту адпрацоўвалася тэхніка пілатавання і паветранай навігацыі на малых і гранічна малых вышынях», — паведамілі ў Мінабароны.

Пасля выканання задання каля 15.35 на вышыні 200 м самалёт пачаў губляць кіраванне.

Кіраўнік палёту даў лётчыку каманду катапультавацца. Лётчык здолеў адвесці машыну ад вёскі Навіны Навагрудскага раёна. За два кіламетры ад гэтай вёскі самалёт упаў.

Для высвятлення прычын здарэння створаная камісія Міністэрства абароны. Расследаванне гібелі самалёта даручана галоўнаму следчаму ўпраўленню Следчага камітэта. Распачата справа па частцы 1 арт. 465 КК (парушэнне правілаў палётаў або падрыхтоўкі да іх).

Эксперт: Авіякатастрофы пачасціліся з-за старэння лётнага парка

На просьбу радыё «Свабода» катастрофу пад Навагрудкам пракаментаваў вайсковы аглядальнік газеты «Беларусы і рынак» Аляксандр Алесін.

Ён адзначыў, што калісьці ў Беларусі катастрофы вайсковых самалётаў былі надзвычайнай рэдкасцю, ён прыгадаў толькі гібель першага Героя Беларусі Уладзіміра Карвата ў 1996 годзе. Аднак апошнім часам гэтыя катастрофы сталі часцейшымі. Эксперт не бачыць прычыны гэтага ў малой колькасці лётных практыкаванняў пілотаў, Беларусь закупіла ва Украіне належную колькасць вучэбных самалётаў, ёсць авіятрэнажоры, так што справа не ў кваліфікацыі лётчыкаў, а ў старэнні лётнага парку.

Самалёты рамантуюць, нават мадэрнізуюць, але кардынальнага аднаўлення авіяпарку ВПС не адбываецца — падкрэсліў Аляксандр Алесін.

Прычына вельмі простая — недахоп грошай. Баявыя самалёты — адна з самых дарагіх вайсковых машын, і ў вайсковым бюджэце на закупку іх грошай няма. Нягледзячы на шчыльныя стасункі з Расеяй, прычым асабліва ў вайсковай сферы, Расея ўсё ж не збіраецца проста перадаваць новыя баявыя самалёты свайму саюзніку.

У выніку падвышаецца імавернасць аварый і непаладак, і колькасць адпаведных выпадкаў. Аляксандр Алесін прыгадаў гібель двух беларускіх лётчыкаў-пілётаўСу-27 у жніўні 2009 году на авіяшоў у польскім Радаме.

Эксперт прагназуе, што з прычыны старэння авіяпарку частата падобных катастроф, на жаль, будзе павялічвацца.

Су-25 — савецкі браняваны дагукавы штурмавік, прызначаны для непасрэднай падтрымкі сухапутных войскаў над полем бою ў любы час сутак пры прамой бачнасці цэлі, а таксама для знішчэння аб’ектаў з зададзенымі каардынатамі кругласутачна ў любых метэаўмовах. У расійскіх войсках мае неафіцыйную назву «Грак», па версіі НАТА — «Жабіная лапка» (Frogfoot).

ТТХ Су-25

Размах крыла-14,4 м

Даўжыня самалёта — 15,3 м

Вышыня самалёта — 5,2 м

Маса — 16,5–19,5 т

Столя вышыні — 10 км

Максімальная хуткасць — 950 км/г

Экіпаж — 1 чалавек, у пары — 2

Дальнасць палёта — 1250 км.

• 0
• 0
• 0
• 0
• 0
• 0
• 0
• 0