У жніўні ў Нямеччыне прайшлі ХХ Сусьветныя дні каталіцкай моладзі, у якіх узялі ўдзел больш за мільён чалавек з 197 краін сьвету. Ад Беларусі бралі ўдзел каля тысячы чалавек, што сабраліся для сумеснай малітвы і абмеркаваньня надзённых пытаньняў.
Зьміцер Кузьняцоў, навучэнец Барысаўскага палітэхнікуму, падарожнічаў разам з групай моладзі з Барысава, Менску і Маладэчна:
«Зь Беларусі з намі было трыццаць сьвятароў і адзін біскуп. Зь вялікім хваляваньнем наведалі Кёльнскі сабор, дзе захоўваюцца рэліквіі Трох Каралёў. Моцна натхніла тое, што вельмі блізка бачылі некалькі разоў папу Бэнэдыкта XVI. Усе беларусы асобна зьбіраліся ў касьцёле Сьвятога Язэпа. 20 жніўня моладзь згуртавалася на вялікім пляцы непадалёк ад Кёльну — Марыенфэльд. Зарэгістравалася каля 800 тыс., а ўсяго людзей было больш за мільён.
21 жніўня ўсе ўзялі ўдзел у імшы, якую адслужыў пантыфік. Ніколі ў жыцьці я ня бачыў такой колькасьці народу — гэта было мора, а берагоў яго не было відаць. У сваёй прамове Бэнэдыкт XVI прааналізаваў найбольш актуальныя праблемы сучаснасьці і заклікаў моладзь быць паўсюль сьведкамі Ісуса Хрыста, ісьці па жыцьці ўсьлед за Бэтлеемскай зоркай, несьці слова Божае ўсім навакольным.
Пробашч Менскага касьцёлу Найсьвяцейшай Панны Марыі Юры Быкаў адзначыў, што самым галоўным на Сусьветных днях было пачуцьцё хрысьціянскай еднасьці ў маладых людзей. «Моладзь з розных куткоў сьвету адносілася адзін да аднаго зь вялікай павагай, пашанай, зацікаўленасьцю. Пры такім вялікім згуртаваньні народу не адбывалася ніякіх непаразуменьняў, спрэчак. Не было відаць і п’яных. Гэта паказвае вялікую любоў і моц, якую мае Бог. Нашы юнакі атрымалі важны ўрок таго, як вялікія чалавечыя супольнасьці могуць існаваць у згодзе, бесканфліктна».
Наступная сустрэча маладых каталікоў заплянавана на 2008 год, мяркуецца правесьці яе ў Аўстраліі.Чаму так далёка? «Бо гэты кантынэнт таксама хоча прыняць удзел у супольнай малітве, а моладзь усюды даедзе!» — перакананы кс.Юры.
18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць48
Каментары