Цяпер у краіне налічваецца 347 калгасаў. Да 2016 года плануецца пераўтварыць іх у гаспадарчыя таварыствы або камунальныя унітарныя прадпрыемcтвы.
Да канца 2016 года ў Беларусі будуць пераўтвораны ўсе калгасы. Як паведаміў на прэс-канферэнцыі 21 сакавіка міністр сельскай гаспадаркі і харчавання Леанід Заяц, гэта прадугледжана праектам указа прэзідэнта «Аб некаторых пытаннях калгасаў».
Паводле яго словаў, на сёння ў краіне працуе 347 калгасаў. Дакументам прадугледжана прыняцце рашэння калгасамі аб пераўтварэнні ў гаспадарчыя таварыствы або камунальныя ўнітарныя прадпрыемствы і іншыя.
«Прыняцце такога дакумента выклікана тым, што сёння статуты калгасаў страцілі сваю значнасць і не адпавядаюць сучасным заканадаўчым нормам. Яны таксама ўваходзяць у супярэчнасць з Падатковым кодэксам», — патлумачыў міністр.
Ён адзначыў, што прыняцце ўказа «дазволіць канкрэтызаваць адносіны ўласнасці, паколькі сёння ў калгасах адсутнічае парадак пераразмеркавання прыбытку паміж членамі калектыву пасля адчужэння прадпрыемства як маёмаснага комплексу».
Указам спрашчаецца працэдура продажу сельгаспрадпрыемстваў з мэтай прыцягнення інвестыцый і прадугледжваецца стварэнне роўных умоў пры аказанні дзяржаўнай падтрымкі.
Дакументам будзе створана прававая нарматыўная база для арганізацыі калгасамі новых суб'ектаў гаспадарання для «вываду іх на больш высокі ўзровень гаспадарання».
Каментары