Брытанскае кіно для паспалітых гурманаў. Забытая стужка надзеі брытанскага хорару Майкла Рыўза зь легендарным Барысам Карлафым і хуліганская кінафантазія Тэры Гіліяма для ўсёй сям’і.
Брытанскае кіно для паспалітых гурманаў.
Яго называлі надзеяй брытанскага хорару. Але ён памёр дачасна. Забытая стужка таленавітага рэжысэра Майкла Рыўза зь легендарным Барысам Карлафым.
А галоўны жартаўнік ад “Монці Пітону” Тэры Гіліям парадуе ўсю сям’ю хуліганскай кінафантазіяй.
12 лістапада, панядзелак, ТV-21, 23.35; 13 лістапада, аўторак, ТV-21, 07.35
ЧАРАЎНІКІ (Волшебники / The Sorcerers)
Вялікабрытанія, 1967, каляровы, 84 хв.
Рэжысэр: Майкл Рыўз
Ролі выконваюць: Барыс Карлаф, Кэтрын Лэйсі, Ян Агілві, Элізабэт Эрцы, Віктар Генры, Сьюзан Джордж, Салі Шэрыдан, Айвар Дзін, Альф Джойнт
Жанр: Жудасная фантастыка паводле сцэнару Майкла Рыўза і Тома Бэйкера дый ідэі Джона Бёрка
Адзнака: 7
Стары прафэсар (Барыс Карлаф), якога высьмейвалі калегі, стварыў машыну, з дапамогай якой можна гіпнатызаваць людзей і на адлегласьці кіраваць іхняю воляй. Разам з жонкай Эстэл (Кэтрын Лэйсі) ён запрашае выпадковага маладога чалавека “пакаштаваць новых пачуцьцяў”. Але ахвяра экспэрымэнту губляе кантроль над сваім жыцьцём, а старая пачынае забіваць чужымі рукамі…
Адна з апошніх карцінаў Барыса Карлафа – клясычнага Франкенштэйна й Муміі. У “Чараўніках” ягоны герой – станоўчы пэрсанаж (праўда, ня здольны спыніць зло). А гераіня Кэтрын Лэйсі – сапраўдная фурыя, якая адкрывае асалоду беспакаранай улады.
У карціне Майкла Рыўза, які памёр маладым, зьнямогласьць і зайздрасьць старасьці рыфмуюцца з нудой й спустошанасьцю маладосьці, стомленай сэксуальнаю рэвалюцыяй.
Загіпнатызаваны забойца, які прымушае ахвяру сьпяваць на цёмных вуліцах, чужыя жэсты й страта памяці, пагоні, скрыўлены твар няшчаснай старой... У фільме мала адмысловых эфэктаў, але шмат напружанага чаканьня й псыхалягічных нюансаў.
Карціна на 13 гадоў апярэдзіла “Сканэраў” Дэйвіда Кронэнбэрга.
13 лістапада, аўторак , TV-21 13:25 21:25; 14 лістапада, серада, TV-21 05:25
БАНДЫТЫ ЧАСУ (Бандиты времени / Time Bandits)
Вялікабрытанія, 1981, каляровы, 107 хв.
Рэжысэр: Тэры Гіліям
Ролі выконваюць: Джон Кліз, Шон Конэры, Шэры Дзювал, Кэтрын Гэлманд, Ян Голм, Майкл Палін, Ральф Рычардсан
Жанр: Фантазійныя прыгоды для сямейнага прагляду
Прызы: Намінацыі на прэмію “Сатурн” за найлепшую рэжысуру, найлепшы сцэнар, найлепшыя адмысловыя эфэкты, прэзыэнцкая прэмія “Сатурн”, намінацыя за найлепшы фільм на МКФ Фантаспорта – усяго 8 прэмій і 1 намінацыя
Аднойчы ў спальні маленькага Кевіна адчыняюцца дзьверы – і адтуль вывальваюцца карлікі бандыцкага выгляду, якія зацягваюць хлопца ў свае прыгоды. Хеўра на чале з авантурнікам Рэндалам вандруе па прасторы й часе, выкарыстоўваючы скрадзеную мапу чорных дзірак. Гістарычныя пэрсанажы, сярод якіх ёсьць Агамемнан (Шон Конэры) і Напалеон (Ян Голм) – будуць вельмі незадаволеныя, чаго нельга сказаць пра гледачоў…
Каментары