Злучаныя Штаты Амерыкі задаволеныя тым, што Беларусь не прызнала анэксію Крыма Расіяй. Пра гэта заявіў намеснік памочніка дзяржсакратара ЗША па пытаннях дэмакратыі, правоў чалавека і працы Томас Меліа 10 верасні журналістам у Мінску па выніках візіту міжведамаснай дэлегацыі ўрада ЗША.
«Выказваем задавальненне, што ўрад Беларусі не прызнаў анэксію Крыма Расіяй і што Мінск пагадзіўся прыняць сустрэчу па пошуку шляхоў вырашэння канфлікту ва Украіне», — сказаў ён.
Міжведамасная дэлегацыя ЗША знаходзіцца ў Мінску з 8 па 11 верасня.
9 верасня з дэлегацыяй сустрэўся намеснік міністра замежных спраў Аляксандр Гур'янаў. У сустрэчы ўдзельнічалі памочнік адміністратара Агенцтва ЗША па міжнародным развіцці Пэйдж Александэр, намеснік памочніка міністра абароны ЗША Эвелін Фаркас, намеснік памочніка дзяржаўнага сакратара ЗША Томас Меліа, часовы павераны ў справах ЗША ў Беларусі Скот Роланд, супрацоўнікі Дзярждэпартамента, рэгіянальнага аддзялення Агенцтва ЗША па міжнародным развіцці і амбасады ЗША ў Мінску.
Каментары