Міністэрства транспарту і камунікацый сумесна з Міністэрствам фінансаў і Банкам развіцця Беларусі вырашае пытанне аб дадатковым фінансаванні для завяршэння будаўніцтва другой Мінскай кальцавой аўтадарогі ва ўстаноўлены тэрмін — да 1 студзеня 2017 года, паведаміў 20 мая на прэс-канферэнцыі першы намеснік міністра транспарту і камунікацый Аляксей Аўраменка.
Ён адзначыў, што сродкі для завяршэння другога этапу будаўніцтва МКАД-2 прадугледжаныя дзяржаўнай інвестыцыйнай праграмай, а таксама фінансаваннем з боку Банка развіцця. «На сённяшні дзень для ўводу МКАД-2 сродкаў недастаткова. Таму мы сумесна з Міністэрствам фінансаў і Банкам развіцця прапрацоўваем пытанне аб дадатковым фінансаванні ў мэтах безумоўнага ўводу гэтай дарогі да 1 студзеня 2017 года», — удакладніў Аўраменка.
«Сродкі першапачаткова былі запланаваныя не ў поўным аб'ёме з той умовай, што мы недзе блізу лета зноў да гэтага пытання вернемся. Каб скончыць, нам яшчэ неабходна 1,4 трлн. рублёў», — сказаў першы намеснік міністра.
Паводле яго слоў, агульны кошт МКАД-2 ацэньваецца ў 5,4 трлн. рублёў. Пакуль інтэнсіўнасць руху на ўжо адкрытым участку МКАД-2 невялікая, але ў Мінтрансе разлічваюць, што сітуацыя зменіцца найперш з-за пераарыентацыі транзітных патокаў.
У ліку пераваг выкарыстання МКАД-2 Аўраменка вылучыў адсутнасць сезонных вагавых абмежаванняў на праезд цяжкавагавага транспарту, бо аўтадарога выкананая ў цэментабетонным пакрыцці. Акрамя таго, траса бясплатная, што скарачае выдаткі перавозчыкаў, дарога новая і камфортная для руху. Сёння перавозчыку, калі ён транзітам перасякае Беларусь з Гродна, і танней, і зручней ехаць па МКАД-2, чым выкарыстоўваць першую кальцавую. «Гэта значыць асноўны разлік на транзітны транспарт, ну і грамадзянам вакол Мінска таксама будзе зручней перамяшчацца», — падкрэсліў першы намеснік міністра транспарту.
Рашэнне аб ўзвядзенні другой МКАД было прынятае яшчэ ў 2010 годзе, але яе актыўнае будаўніцтва пачалі ў 2014 годзе пасля даручэнняў Аляксандра Лукашэнкі. Мэта праекта — разгрузіць сталіцу ад транзітнага патоку аўтамабіляў, палепшыць экалагічнае становішча.
16 снежня 2015 года быў цалкам адкрыты рух па другой кальцавой на ўчастку ад аўтамабільнай дарогі Р28 Мінск — Маладзечна — Нарач да аўтамабільнай дарогі М6 Мінск — Гродна. Для аўтатранспарту сталі даступнымі прыкладна 47 кіламетраў новай аўтатрасы, што спалучыла віцебскую і гродзенскую шашы. Гэта першы этап узвядзення МКАД-2, які быў падзелены на пяць чэргаў. На першых трох з іх работы былі завершаныя раней — 6 кастрычніка адбылося ўрачыстае адкрыццё дарогі з удзелам Лукашэнкі.
На другім этапе стварэння МКАД-2 плануецца пабудаваць дарогу працягласцю 41,4 кіламетра, якая злучыць гродзенскую і брэсцкую шашы. Гэтыя работы мяркуецца завяршыць да 1 студзеня 2017 года. Агульная працягласць МКАД-2 складзе прыкладна 160 км: новае будаўніцтва — прыблізна 90 кіламетраў, а таксама існыя ўчасткі аўтадарог М1/Е30, М2 і Р80 — 70 кіламетраў.
Чатырохпалосная дарога з цэментабетонным пакрыццём адпавядае сучасным патрабаванням: па дзве паласы руху ў кожным кірунку, масты і шляхаправоды, якія падзяляюць транспартныя патокі, двухбаковая бар'ерная агароджа па восі дарогі для выключэння лабавых сутыкненняў, сеткавая загарода ад жывёл ўздоўж трасы ў раёне лясных масіваў, светлавыя табло для інфармавання вадзіцеляў пра сітуацыю на дарозе.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча20
Каментары