Пераможцам 28-га фестываля маладой беларускай музыкі, які праходзіў у Гарадку (Польшча) названы менскі арт-рок-гурт Teleport. У конкурсе ён абышоў гурты BarRokka, Leibonik і SnopSnoǔ.
Teleport быў заснаваны ў 2012 годзе. У 2015 годзе гурт выдаў дэбютны альбом «Маўкліва» з песнямі на беларускай і англійскай мовах, над якім працаваў паўтара года. Музыкі натхняліся песнямі The Beatles, Гары Нілсана, Queen і The Beach Boys. Эксперты ацанілі плытку ў 6,75 бала з 10, адзначыўшы смеласць і наватарства, разнастайнасць і складанасць музыкі, але таксама яе халоднасць і аддаленасць. Майстэрынгам кружэлкі займаўся брытанскі гукарэжысёр Стыў Кітч.
Гурт быў названы «Дэбютам года» на прэміі «Даём рады-2015», называўся ў топе замежных экспертаў прэміі Experty.by, быў у шорт-лістце прэміі «Героі года — 2015» і намінаваўся на «Дэбют году» ў прэміі Rock Profi.
У 2016 годзе гурт змяніў склад. На сёння лідарам яго выступае Яўген Цярэнцьеў. Ён як сольны выканаўца ў 2015 годзе ўвайшоў у тройку прызёраў конкурсу «Заспяваў 2.0». У абноўленым складзе гурт узяў удзел у шоўкейс-фестывалях у Таліне, Вільні і Гамбургу.
Каментары