Карлюкевіч расказаў пра экспертную раду пры Мінінфарме, папраўкі ў Закон аб СМІ і перспектывы трансляцыі ўкраінскага тэлеканала
У Мінску пачала работу выстава «СМІ ў Беларусі — 2018», адкрывалі яе чыноўнікі Міністэрства інфармацыі і кіраўнікі дзяржаўных СМІ.
Падчас мерапрыемства міністр інфармацыі Аляксандр Карлюкевіч адказаў на пытанні журналістаў.
Першымі пытанне задалі журналісты «Нашай Нівы», яно было наступнае: пры кожным ведамстве ёсць «эксперты», з якімі чыноўнікі могуць кансультавацца пры прыняцці рашэнняў. Па інфармацыі «НН», такіх экспертаў пры Мінінфарме каля 20 чалавек, сярод іх ніводнага недзяржаўнага рэдактара ці журналіста. «Чаму так?» — спыталіся мы.
Міністр сказаў, што юрыдычна гэта ніяк не зафіксавана.
«Няма такога экспертнага інстытута, які зафіксаваны ў той ці іншай пастанове. Я назваў бы экспертную супольнасць больш шырокай, яна прысутнічае ў многіх дзяржаўных і грамадскіх інстытуцыях. Таму гэта даволі шырокая экспертная група, і што мы ангажуем кагосьці аднаго… такога няма. Дарэчы, у нас будзе медыяфорум, на які мы будзем запрашаць і прадстаўнікоў грамадскіх інстытуцый, і дзяржаўных структур, і розных экспертаў», — адказаў Карлюкевіч.
Таксама ў міністра спыталіся, якія папраўкі будуць у абноўлены закон «Аб СМІ» перад другім чытаннем у парламенце.
«Змены будуць, — запэўніў міністр. — Яны ўнесены з улікам прапаноў грамадскіх структур, дзяржаўных інстытутаў і дэпутатаў. Канкрэтна я не хачу казаць, вы хутка даведаецеся — гаворка пра некалькі дзён. Я лічу, што праўкі, у параўнанні з першым чытаннем, істотныя».
«Ці не зашмат у нашых СМІ Кісялёвых і Салаўёвых?» — спыталіся таксама ў Карлюкевіча.
«Працуйце, умацоўвайце іншую прастору», — параіў ён.
Што датычыць пачатку вяшчання ўкраінскага тэлеканала, то Карлюкевіч чарговы раз нагадаў, што «праект разглядаецца».
«Мы працуем у гэтым накірунку, тут [на выставе], дарэчы, прадстаўлены ўкраінскія тэлевізійшчыкі, і мы прыйдзем да нейкага рашэння. Мы ў гэтым зацікаўленыя», — падсумаваў міністр.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі72
Каментары