Маленькі Дэкстэр трапіў у СМІ ў канцы ліпеня: тады яго маладая мама закрылася ў машыне разам з сынам на 15 гадзін. Прычынай стала тое, што, па словах жанчыны, бацька малога не даваў ёй бачыцца з сынам. У выніку Дэкстэра да суда атправілі ў прытулак.
12 верасня суд Маскоўскага раёна Брэста пастанавіў, што дзіця застанецца з бацькам. Уладзіслаў Кузьміч, бацька малога, жыве ў Брэсце.
Алена Лукашэвіч-Кузьміч — мама Дэкстэра — жыве ў Мінску. Але пакуль ішоў суд, яна была ў Брэсце, ды і па сёння знаходзіцца там.
Рашэннем суда жанчына не задаволеная. Яна патлумачыла «Нашай Ніве», чаму:
«Я буду падаваць апеляцыю. Чаму суд стаў на бок бацькі сына?
Прадстаўнік мужа пачаў пісаць скаргі на органы апекі абсалютна ва ўсе інстанцыі і запалохаў іх. Пісаў, што апека перадузята ставіцца да гэтай справы і гэтак далей. Запалохаў, іншай прычыны я не бачу.
Раней апека заўсёды была за мяне, гэтая ж пазіцыя агучвалася на судовых пасяджэннях.
Мы паехалі разам у прытулак, пасля Уладзіслаў павёз сына да сябе дадому.
Пакуль я буду ў Брэсце, паспрабую дамовіцца ўсё ж з бацькам свайго сына. Хачу пабачыць сына на выходных. Але ж невядома пакуль, ці пусціць мяне Уладзіслаў да сына, ці будзе перашкаджаць нашым сустрэчам… Я ж не ведаю. Прынамсі, на судзе ён казаў, што не будзе забараняць мне бачыцца з Дэкстэрам. Канкрэтны час, калі і колькі я змагу бачыць сына, суд не вызначаў. Таму зараз будзем спрабаваць дамаўляцца з Уладзіславам.
Можа, ён пакуль не хацеў ісці на кантакт, бо былі суды? Спадзяюся, пазней зможам з ім наладзіць адносіны».
Чытайце таксама:
Сталічная фатографка спрабавала забраць сына ў былога мужа ў Брэсце і закрылася ў машыне з малым на 14 гадзін
«Я баялася: раптам у мужа дах паехаў?» У мінчанкі, якая 14 гадзін сядзела ў машыне з сынам Дэкстэрам, свая праўда
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача45
Каментары