З 1 студзеня Беларусь спыніла пастаўкі нафтапрадуктаў за мяжу: бензіну ўсіх марак, газы, дызелю, мазуты і гэтак далей.
Гэта зроблена для «забеспячэння патрэбаў народнай гаспадаркі». Адпаведную вытрымку з пастановы Саўміна ў сваім тэлеграм-канале апублікаваў журналіст «Нашай Нівы» Арцём Гарбацэвіч.
Дзейнічае пастанова да «асаблівага распараджэння».
Экспарт нафтапрадуктаў — адна з асноўных крыніц прыбытку беларускага бюджэту.
Сёння стала вядома, што ад 1 студзеня Расія спыніла пастаўку нафты для беларускіх нафтаперапрацоўчых заводаў.
НПЗ працуюць са зніжанай загрузкай на рэштках сыравіны, што былі назапашаныя ў снежні. Новыя кантракты на пастаўку нафты пакуль не падпісаныя.
Нагадаем, што 31 снежня прэс-сакратар прэзідэнта Расіі, адказваючы на пытанні журналістаў, прапанаваў у адносінах з Беларуссю «апакаліптычныя сцэнары» не абмяркоўваць — «пакуль».
У сваю чаргу, Аляксандр Лукашэнка 31 снежня даў загад ураду забяспечыць ўжо ў найбліжэйшыя дні пастаўку нафты з альтэрнатыўных крыніц. Перш за ўсё размова ідзе аб пастаўках чыгуначным транспартам з партоў на Балтыцы, а таксама аб задзейнічанні для альтэрнатыўных паставак нафтаправода «Дружба».
Пры гэтым, як стала вядома, кіраўнік «Газпрома» Аляксей Мілер і пасол Беларусі ў Расіі Уладзімір Сямашка падпісалі пратокол пра цэны на газ для Беларусі толькі на студзень і люты 2020 года. У гэтыя два месяцы цана для Беларусі застанецца на ранейшым узроўні — $127 за тысячу кубаметраў.
Расія трымаецца ранейшай тактыкі: трымаць краіны на максімальна кароткіх кантрактах на пастаўкі энерганосьбітаў. У выпадку краін-сатэлітаў, кантракты абумоўліваюцца таксама шэрагам палітычных умоў.
Цяпер чытаюць
Што цяпер з італьянскімі візамі? Масавыя адмовы? Турфірмы называюць альтэрнатыву6
Што цяпер з італьянскімі візамі? Масавыя адмовы? Турфірмы называюць альтэрнатыву
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары