Расія збіраецца забараніць увоз яшчэ 800 найменняў беларускай малочнай прадукцыі. Пра гэта паведаміў кіраўнік Расспажыўнагляду Генадзь Анішчанка.
Федэральная служба па наглядзе ў сферы абароны правоў спажыўцоў і дабрабыту чалавека Расіі (Расспажыўнагляд) мае намер забараніць увоз яшчэ 800 найменняў беларускай малочнай прадукцыі ў дадатак да раней забароненых 500 відаў.
«Як паказаў дадатковы аналіз, выкананне тэхрэгламенту на малако і малочную прадукцыю, пераафармленне дакументаў на тэрыторыі Смаленскай і Бранскай абласцей праводзілася з відавочным парушэннем падобнага роду працэдур», — паведаміў РІА Новости кіраўнік службы Генадзь Анішчанка.
Паводле яго слоў,
у выніку будзе адклікана 406 санітарна‑эпідэміялагічных заключэнняў, выдадзеных або перааформленых для беларускай прадукцыі ў Бранскай вобласці. Такая ж доля чакае 107 заявак на беларускую малочную прадукцыю, якія ўнесены расійскімі пастаўшчыкамі ў Бранскай вобласці.
Што тычыцца Смаленскай вобласці, то, як паведаміў Г.Анішчанка, пастаўкі, ажыццёўленыя па 198 выдадзеных дазволах, будуць прыпыненыя, яшчэ 92 дакументы, што знаходзяцца ў лісце чакання, будуць адкліканыя.
6 чэрвеня кіраўнік Росспажыўнагляду вынес рашэнне аб забароне на ўвоз у Расію 500 відаў беларускіх малочных прадуктаў з‑за таго, што на іх дагэтуль не аформлены ўсе дакументы ў адпаведнасці з расійскім тэхрэгламентам, што набыў моц у снежні 2008 года.
Г.Анішчанка таксама заявіў, што перамовы з Беларуссю па «малочнай» праблеме наўрад ці магчымыя: «Што да перамоў, то Расспажыўнагляд змушаны адклікаць раней выказанае пажаданне па перамовах з беларускім бокам, паколькі, паводле ацэнак некаторых яго чыноўнікаў, гэта праблема з’яўляецца надуманай. Адцягваць нашых беларускіх калегаў па надуманых праблемах мы лічым неразважлівым і просім прабачэння за турботы».
5 чэрвеня прэм’ер‑міністр Расіі Уладзімір Пуцін заявіў пра неабходнасць фармавання адзіных умоў давання датацый сельгасвытворцам Расіі і Беларусі.
Паводле яго слоў, датацыі, якія Беларусь дае сваім вытворцам цэльнага малака, дасягаюць 24%, у той час як у Расіі гэтыя датацыі складаюць толькі 3%.
Прэм’ер‑міністр паведаміў, што закранаў гэтую тэму падчас сустрэчы з беларускімі партнёрамі і тыя выказалі гатоўнасць абмяркоўваць пытанне аб датацыях на перамовах. Пры гэтым У.Пуцін падкрэсліў: «Я добра ведаю, у якім рэжыме гэтыя падыходы выпрацоўваюцца з нашымі калегамі — гэта можа заняць шмат часу, таму я цяпер даў указанне мытнай службе сфармуляваць прапановы, якія б дазволілі нам стварыць неабходныя ўмовы для правядзення гэтага перамоўнага працэсу».
1 чэрвеня ў інтэрв’ю буйным расійскім друкаваным выданням А.Лукашэнка абвінаваціў Расію ў абмежаванні паставак беларускага харчавання, якое таннейшае дзякуючы дзяржпадтрымцы сельскай гаспадаркі.
Цяпер чытаюць
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1414
Каментары