Міністр гандлю: У росце цэнаў вінаватая «імпартная інфляцыя», трэба змяншаць сабекошт
Міністр антыманапольнага рэгулявання і гандлю Аляксей Багданаў сёння расказаў журналістам, якія меры будуць прымацца для стабілізацыі цэнаў на ўнутраным рынку, паведамляе БЕЛТА.
«Галоўная асаблівасць мінулага года — так званая імпартная інфляцыя. Рэкордныя паказчыкі па інфляцыі адзначаныя ў краінах-суседзях, у нашых гандлёва-эканамічных партнёраў.
Мы ўвозім сыравіну для сваёй вытворчасці, камплектуючыя, тавары крытычнага імпарту. Вядома, гэта разаграе нашу ўнутраную інфляцыю, паколькі расце сабекошт прадукцыі ў нашых таваравытворцаў, якія выкарыстоўваюць імпартную сыравіну. Таму ў бягучым годзе нам неабходна будзе праводзіць працу па зніжэнні сабекошту», — сказаў Аляксей Багданаў.
Паводле яго слоў, такая праца ўключае барацьбу на конкурсных працэдурах за больш нізкі кошт набытага тавару, аптымізацыю бізнэс-працэсаў на кожным прадпрыемстве.
«Мы павінны будзем больш насычаць нашы паліцы айчыннай прадукцыяй, якая апрыёры будзе таннейшая за імпартную», — адзначыў міністр.
Акрамя таго, у планах прыняць шэраг нарматыўных прававых актаў. Сярод іх указ, дзе будзе сістэматызавацца сістэма дзяржрэгулявання і будуць «аптымізаваныя» некаторыя віды дзяржаўных закупак.
Каментары