Газета Лукашэнкі назвала студэнтак БДУ «пісюхамі». А 71-гадовую прафесарку — «хахляцка-быдляцка»
Пад агонь прапаганды трапілі доктарка фізіка-матэматычных навук Наталля Абрашына-Жадаева і студэнты факультэта журналістыкі.
«Мінімум дзве чацвёртакурсніцы з задавальненнем вывалілі экстрэмістам з «Нашай Нiвы» гадасці пра свайго выкладчыка Лілію Ананіч. Тая сумленна спрабавала ў межах свайго курсу прывіць пісюхам рознабаковыя погляды на складаныя рэчы», — піша выданне «СБ. Беларусь сегодня».
«Лекцыі было агідна слухаць, пасля першага сеансу прапаганды ў мяне ўвесь дзень балела галава, таму што ў цвярозым розуме цяжка ўспрымаць гэтую інфармацыю», — расказвалі студэнткі «Нашай Ніве».
«Не, гэта таму, што галава занадта маленькая. Вось і баліць, не ўмяшчаючы», — каментуе прэзідэнцкае выданне.
«Не было такога, што падчас лекцыі яна ў кагосьці пыталася меркаванне. Сядзіць і сама сабе гаворыць нібыта. Ніхто яе не слухаў, усе займаліся сваімі справамі», — кажуць студэнткі.
«А гэта таму, што вы вучыцца прыйшлі. А не наадварот», — каментуе «СБ».
У тым жа артыкуле прэзідэнцкая газета вылівае памыі і на доктара фізіка-матэматычных навук Наталлю Абрашыну-Жадаеву: «Справа ў тым, што ў БДУ з ёй больш не хочуць працаваць. А яна вось напаказ упёрлася: не пайду».
Прэзідэнцкая газета называе прафесара Абрашыну-Жадаеву «дацэнтам» і тлумачыць яе ўчынак, захоўваем арфаграфію аўтара, — «хохляцка-быдляцка впертасць».
«Галоўнае — ачысціць краіну ад такіх», — піша выданне.
71-гадовая Наталля Абрашына-Жадаева працуе ў навуцы з 1972 года. Яна ветэран працы, сёлета спаўняецца 50 гадоў яе працоўнага стажу. Прафесарку кафедры вышэйшай матэматыкі БДУ звольнілі пасля таго, як яна запісала зварот у абарону свайго звольненага калегі Максіма Шундалава.
«СБ. Беларусь сегодня» — гэта выданне Адміністрацыі прэзідэнта. Як і іншыя падобныя СМІ, яно фармальна лічыцца дзяржаўным, але ў рэальнасці не адлюстроўвае ўсяго спектру меркаванняў грамадзян дзяржавы.
Чытайце яшчэ: Газета Лукашэнкі назвала Алексіевіч «больной женщиной» і «старой дурой»
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі40
Каментары