Ва Украіне будуць упершыню судзіць расійскага вайскоўца за забойства мірнага жыхара
У Сумскай вобласці расійскага вайскоўца будуць судзіць за забойства мірнага жыхара, паведаміла генпракурор Украіны Ірына Венедыктава.
Офіс генпракурора накіраваў у суд абвінаваўчы акт у дачыненні да камандзіра аддзялення в/ч 32010 4-й танкавай Кантэміраўскай дывізіі Маскоўскай вобласці Вадзіма Шышымарына.
Паводле паведамлення Венедыктавай, 21-гадовы расійскі вайсковец 28 лютага ў Сумскай вобласці забіў 62-гадовага бяззбройнага мірнага жыхара, які ехаў па абочыне на ровары.
«Калону, у якой быў сяржант Шышымарын, разбілі нашы УСУ. Уцякаючы, ён з яшчэ 4 калегамі абстралялі з аўтаматаў прыватны аўтамабіль і завалодалі ім. На скрадзенай машыне з прабітымі імі ж коламі захопнікі заехалі ў вёску. Па дарозе ўбачылі мужчыну, які вяртаўся дадому і размаўляў па тэлефоне. Адзін з вайскоўцаў загадаў сяржанту забіць цывільнага, каб ён не паведаміў пра іх украінскім абаронцам», — заявіла Венедыктава.
Гэта першы выпадак суда над расійскім вайскоўцам ва Украіне. Яго будуць судзіць па артыкуле «парушэнне законаў і звычаяў вайны» КК Украіны. Яму пагражае ад 10 да 15 гадоў пазбаўлення волі або пажыццёвае зняволенне.
Цяпер чытаюць
Арыштавалі прадстаўнікоў кампаніі Bayer у Беларусі15
Каментары