Еўрасаюз пакуль не ўзгадніў шосты пакет санкцый супраць Расіі праз пытанне аб нафтавым эмбарга
Міністры замежных спраў краін Еўрапейскага Саюза пакуль не дамовіліся адносна шостага раўнда санкцый супраць Расіі, паведамляе Reuters са спасылкай на кіраўніка еўрапейскай дыпламатыі Жазэпа Барэля.
Паводле яго слоў, цяжкасці захоўваюцца ў пытанні аднагалоснага ўхвалення прапанаванага нафтавага эмбарга. «Я не магу вам сказаць дакладна, зойме гэта тыдзень ці два», — адказаў кіраўнік еўрапейскай дыпламатыі на пытанне аб тэрмінах.
Міністр замежных спраў Аўстрыі Аляксандр Шаленберг сказаў перад гэтым, што Еўрапейскі Саюз можа ўзгадніць Шосты раўнд санкцый супраць Расеі ў найбліжэйшыя дні.
Але насамрэч Еўрасаюзу спатрэбіцца больш часу для ўзгаднення шостага пакета санкцый супраць Масквы, сказаў у панядзелак міністр замежных спраў Люксембурга Жан Асельборн, дадаўшы, што ў выніку новы комплекс захадаў будзе прыняты.
«У сапраўднасці няма ніякіх апраўданняў для таго, каб не прыняць новы пакет санкцый», — сказаў Асельборн журналістам у Бруселі.
Праблемы з увядзеннем санкцый узнікаюць таму, што супраць нафтавага эмбарга рэзка выступае Венгрыя, якая патрабуе за сваю згоду ўсё больш і грошай, і часу.
Угаварыць прэм'ера Венгрыі Віктара Орбана брусельскай Еўракамісіі не атрымалася, прыйшлося падымаць узровень. Кіраўнікі МЗС таксама не дамовіліся, але зараз ёсць шанец у паслоў краін ЕС.
Калі ж не дамовяцца амбасадары, то Орбана асабіста будуць пераконваць ужо кіраўнікі дзяржаў ЕС на саміце 30—31 траўня.
Каментары