Жыхару Мінска пагражаюць тры гады за «выключны цынізм» у дачыненні да міліцэйскай машыны
На разгляд у суд накіраваная крымінальная справа ў дачыненні да 27-гадовага гараджаніна, якога абвінавачваюць у хуліганстве, піша агенцтва «Мінск-Навіны» са спасылкай на пракуратуру Цэнтральнага раёна.
Паводле матэрыялаў следства, аднойчы вечарам абвінавачаны знаходзіўся ў гасцях у свайго сябра на вуліцы Паўліны Мядзёлкі. Калі сярод ночы ў сяброў скончылася піва, яны пайшлі набыць дабаўкі на АЗС непадалёк.
Калі сябры выходзілі з пад'езда, яны пабачылі прыпаркаваны міліцэйскі «УАЗ». Міліцыянеры якраз прыехалі па выкліку мясцовых жыхароў, якім заміналі шумныя суседзі.
Адзін з мужчын вырашыў справіць малую патрэбу на пярэдняе кола службовай машыны і за гэтай справай быў заспеты ды затрыманы. Паколькі машына была міліцэйская, то ў дачыненні да яго распачалі крымінальную справу.
Чалавеку выстаўлена абвінавачанне ў «наўмысных дзеяннях, якія груба парушаюць грамадскі парадак і выказваюць відавочную непавагу да грамадства, якія адрозніваюцца па сваім змесце выключным цынізмам (хуліганства)». Па ч. 1 арт. 339 Крымінальнага кодэкса яму можа пагражаць пакаранне аж да трох гадоў пазбаўлення волі. Пакуль што ён знаходзіцца пад паручальніцтва.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары