«Газпрам трансгаз Беларусь», Белчыгунка і «іншыя флагманы». Следчы камітэт расказаў пра змаганне з хабарніцтвам
Следчы камітэт расследуе крымінальную справу ў дачыненні да службовых асоб ААТ «Газпрам трансгаз Беларусь». Топ-менеджараў кампаніі абвінавачваюць у хабарах за лабіраванне інтарэсаў асобных пастаўшчыкоў. Пра гэта заявіў начальнік Галоўнага ўпраўлення Следчага камітэта Уладзімір Шышко падчас прэс-канферэнцыі на тэму «аб мерапрыемствах па барацьбе са злачыннасцю і карупцыяй у Беларусі».
«Цэлы шэраг высокапастаўленых службовых асоб гэтай арганізацыі займаліся атрыманнем незаконнага ўзнагароджання ад камерцыйных структур за пастаўку або не пастаўку абсталявання. Узнагароджанне складала сотні тысяч беларускіх рублёў», — расказаў падчас прэс-канферэнцыі Уладзімір Шышко.
Цяпер вырашаецца пытанне аб кампенсацыі гэтых грошай, асноўная маса фігурантаў справы дае прызнальныя паказанні, запэўніў Шышко. Пры гэтым, паводле яго: «Супрацоўнікі кампаніі проста цяпер, не чакаючы заканчэння расследавання, прымаюць меры па ліквідацыі тых шчылін, якія меліся ў іх дзейнасці. «За што яны нам, шчыра кажучы, проста кажуць: «Дзякуй!».
Прадстаўнік СК таксама расказаў, што аналагічная крымінальная справа была распачатая ў дачыненні да службовых асоб Беларускай чыгункі, у найбліжэйшы час яе павінны перадаць у суд. Ёсць таксама справы, заведзеныя ў дачыненні да «топавых прадпрыемстваў, у тым ліку флагманаў», і памеры хабараў там складаюць «мільёны даляраў».
Агульныя страты ад карупцыйных злачынстваў за першае паўгоддзе бягучага года нібыта склалі больш за дзевяць мільёнаў рублёў. Самы вялікі хабар, зафіксаваны ў Беларусі за апошні год, — каля 1 млн даляраў.
Цяпер чытаюць
Што вядома пра экс-афіцэра Службы бяспекі Лукашэнкі Андрэя Спасава, якога пасадзілі за палітыку1
Каментары