«Я адчуваю абдымкі сына і зараз»: апошняе слова ў судзе журналісткі Ксеніі Луцкіной
У Мінскім гарадскім судзе 21 верасня былая журналістка Белтэлерадыёкампаніі Ксенія Луцкіна выступіла з апошнім словам. Ксенію вінавацяць ў змове ці іншых дзеяннях, учыненых з мэтай захопу дзяржаўнай улады (ч. 1 арт. 357 Крымінальнага кодэксу). Пракурор запатрабаваў для яе восем гадоў калоніі, паведамляе «Вясна».
Разглядае справу суддзя Таццяна Фалькоўская.
Ксенія Луцкіна да жніўня 2020 года працавала ў Белтэлерадыёкампаніі. Пасля прэзідэнцкіх выбараў далучылася да страйку супрацоўнікаў холдынгу, а затым сышла з пазіцыі карэспандэнта тэлеканала «Беларусь 2» і ўвайшла ў асноўны склад «Каардынацыйнай рады».
Яна расказавала, што разам з іншымі журналістамі, якія звольніліся, яны планавалі стварыць «альтэрнатыўнае тэлебачанне» на YouTube. Праект развіваўся ў тым ліку пры ўдзеле Акадэміі Прэс-клуба. Першыя перадачы былі запісаныя, запуск павінен быў адбыцца ў студзені 2021.
Ксенію затрымалі 22 снежня 2020 ў Мінску на бульвары Мулявіна. У сваім апошнім слове журналістка Ксенія Луцкіна ўзгадала дні разам з сынам перад затрыманнем:
— 21 снежня 2020 года мы з сынам прыбіралі елку, рыхтаваліся да любага свята. У мяне было адчуванне, што ўсе будзе добра. Раніцай 22 снежня я праводзіла Мацвея ў школу, абняла і пацалавала. Я і сёння адчуваю гэтыя абдымкі. Я засынаю і прачынаюся з гэтым адчуваннем.
Наша елка стаіць у хаце ўжо 21 месяц. Мацвей нікому не дае яе прыбраць — ён чакае маму.
Ксенія сказала, што яе галоўнае жаданне сёння — вярнуцца да сына:
— Яму патрэбна маці. Не сябра, не проста дарослы побач, а маці. Чалавек, які кожны дзень дорыць пачуццё неабмежаванай любві, пачуццё бяспекі, дорыць тое самае дзяцінства. Больш за ўсё я хачу вярнуць веру ў дабрыню і справядлівасць. Я хачу выхаваць чалавека, грамадзяніна, чалавека, які ўмее рабіць правільныя высновы. Вярхоўны суд, прашу аб літасці і гуманнасці, аб магчымасці вярнуцца ў грамадства і прыносіць яму карысць, загладзіць сваю віну словам і справай. Мой сын мае патрэбу ўва мне.
Таксама ў апошнім слове Ксенія нагадала аб сваёй хваробе і неабходнасці ў медыцынскай дапамозе спецыялістаў на свабодзе.
Прысуд ёй будзе абвешчаны 28 верасня.
Джон Коўл прыедзе ў Беларусь 15 верасня. Лукашэнка, аднак папярэдзіў: «вялікай здзелкі» не будзе11
Каментары