Пра гэта заявіў сёння галоўны трэнер БАТЭ на перадматчавай прэс‑канферэнцыі.
Футбалісты барысаўскага БАТЭ маюць намер перамагчы лісабонскую «Бенфіку» у матчы 5‑га тура Лігі Еўропы (Мінск, 2 снежня) і працягнуць барацьбу за выхад у плей‑оф.
Пра гэта заявіў сёння галоўны трэнер барысаўчан Віктар Ганчарэнка на перадматчавай прэс‑канферэнцыі.
Настаўнік шасьціразовых чэмпіёнаў Беларусі адзначыў, што, нягледзячы на канцоўку сезону, яго падапечныя знаходзяцца ў выдатнай фізічнай форме і рыхтуюцца даць бой дасведчанаму партугальскаму клубу. Падтрымаць гульнявы тонус дапамаглі матчы 1/8 фіналу Кубка Беларусі з «Мінскам», у якіх БАТЭ атрымаў перамогі 1:0 і 2:0. У гэтых сустрэчах гульцы барысаўскай каманды паказалі нядрэнны рух і добры, баявы настрой. Віктар Ганчарэнка адзначыў, што ўсе футбалісты, за выключэннем Ігара Стасевіча, здаровыя і рвуцца ў бой. На жаль, з‑за дыскваліфікацыі не зможа адыграць адзін з лепшых абаронцаў Ігар Шытаў, але, на думку трэнера, яго ёсць кім замяніць.
«Бенфіка» і БАТЭ 17 верасня адкрывалі групавы этап турніру матчам ў партугальскай сталіцы і тады поспеху дабіліся гаспадары поля — 2:0.
Цяпер жа беларусы маюць намер узяць рэванш і рэабілітавацца ў вачах сваіх заўзятараў.
Паўабаронца барысаўчан Павел Няхайчык сказаў, што ён, як і ўсе яго партнёры, гарыць жаданнем перамагчы і прайсці ў наступны раунд Лігі Еўропы. Няважна, хто менавіта праб'е вароты «Бенфікі», галоўнае — каб поспеху дабілася каманда. Праўда, адзначыў Павел Няхайчык, дрэнна, калі на трыбунах сталічнага стадыёна «Дынама» будзе шмат свабодных месцаў: падтрымка заўзятараў вельмі важна для футбалістаў, пры поўных трыбунах гуляць значна прыемней, з’яўляецца больш сіл і ў выніку лягчэй перамагаць. Аднак аншлага на «Дынама» не чакаецца —
на сённяшні дзень у касах стадыёна прададзеныя толькі каля 6 тыс. квіткоў.
Пасля 4 тураў становішча ў групе «І» такое: «Бэнфіка» — 9 балаў, «Эвертан» — 6, АЕК і БАТЭ — па 4. Акрамя матча ў Менску 2 снежня грэцкі АЕК будзе прымаць у Афінах англійскі «Эвертан».
У заключным туры 17 снежня БАТЭ адправіцца ў госці да англійскай каманды, а АЕК згуляе ў Лісабоне.
Каментары