«Тытанік» на дне акіяна паступова разбураецца. Колькі ён яшчэ вытрымае?
Абрысы носа лайнера сталі адным з самых вядомых вобразаў, звязаных з патанулым караблём. Аднак новая экспедыцыя да месца гібелі лайнера ўстанавіла, што рэшткі карабля павольна разбураюцца: на ім абвалілася частка металічнай агароджы, піша Бі-бі-сі.
Новыя здымкі носа «Тытаніка» (а ў гэтым месцы адбывалася дзеянне адной з самых знакамітых сцэн фільма з Леанарда Дзі Капрыа і Кейт Уінслет) былі зробленыя падводнымі дронамі падчас апусканняў гэтым летам. Атрыманыя фатаграфіі дэманструюць, якім чынам рэшткі змяніліся за больш чым 100 гадоў пад вадой.
«Дзякуючы поп-культуры, нос «Тытаніка» стаў маментальна вядомым. Менавіта пра яго людзі думаюць, калі ўспамінаюць пра патанулы карабель. Але цяпер ён выглядае інакш, — кажа Тамасіна Рэй з кампаніі RMS Titanic Inc, якая праводзіла экспедыцыю. — Гэта яшчэ адзін напамін пра яго штодзённае разбурэнне. Пастаянна гучыць пытанне — ці доўга яшчэ «Тытанік» будзе там ляжаць? Адказу мы не ведаем, але можам прасачыць за тым, што адбываецца ў рэальным часе».
Аўтары даследавання лічаць, што секцыя агароджы даўжынёй прыкладна 4,5 м абвалілася на працягу апошніх двух гадоў.
Фатаграфіі і лічбавы скан абрысаў карабля, зробленыя падчас экспедыцыі 2022 года, паказваюць, што ў той момант агароджа яшчэ была на месцы, хоць ужо пачынала хістацца. «У нейкі момант метал не вытрымаў, і яна ўпала», — кажа Рэй.
Гэта не адзіная частка карабля, якую разбурыла мора. Металічныя часткі «Тытаніка» паступова паглынаюць мікробы, што прыводзіць да з'яўлення асаблівых сталактытаў з іржы.
Апусканні выявілі разбурэнне афіцэрскіх кают у правай частцы судна, знішчэнне салона і знікненне некаторых памяшканняў, такіх, як капітанскі ванны пакой.
Экспедыцыя, арганізаваная кампаніяй RMS Titanic Inc, адбылася ў ліпені і жніўні гэтага года.
Падчас яе два падводныя апараты з дыстанцыйным кіраваннем зрабілі больш за 2 млн здымкаў і 24 гадзіны добрых відэакадраў. На іх захаваны як драбы карабля, разламаныя напалову ў момант крушэння (яго нос і карма ляжаць прыкладна за 800 метраў адзін ад аднаго), так і вялікая колькасць абломкаў.
Цяпер кампанія старанна вывучае атрыманыя выявы, каб ідэнтыфікаваць усе захаваныя аб'екты і праз некаторы час стварыць 3D-скан усяго месца караблекрушэння.
Цяпер чытаюць
Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай6
Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3232
Каментары