У вёсцы Ілава Мядзельскага раёна на таргі выставілі вінзавод. Гэты лот цікавы, па-першае, тым, што віно тут робяць з 1832 года. А па-другое, гэты завод спрабуюць прадаць не ўпершыню. І, як вынікае з даных гандлёвай пляцоўкі, за гэты час стартавы кошт знізіўся ў тры разы, піша Office Life.
Завод належыць мясцоваму УП «Ілаўскае». Калісьці гэта было адно з самых буйных прадпрыемстваў Мядзельскага раёна — тут працавала амаль 150 чалавек. Прадпрыемства выпускала спірт, пладовыя і садова-ягадныя віны і нават кальвадас. А яшчэ — сокі і іншую прадукцыю.
Пра страты прадпрыемства загаварылі яшчэ ў 2018 годзе — яно ўжо мела пратэрміноўку па плацяжах у бюджэт. Гэта звязвалі з ростам закупачных цэн на сыравіну і матэрыялы і высокай канкурэнцыяй у гандлі.
Тады ўрад нават прапанаваў кіраўніку кампаніі «Тытунь-Інвест» Паўлу Тапузідзісу курыраваць прадпрыемства і дапамагчы яму з рэалізацыяй прадукцыі. Пазней на завод прызначылі антыкрызіснага кіраўніка.
Стартавы кошт сёння складае каля 3,3 млн рублёў, а мінімальны — наогул менш за 2,2 млн. А калісьці прадпрыемства хацелі прадаць амаль за 11 млн. Чарговыя таргі адбудуцца 4 верасня.
Што датычыцца гістарычнай падстаўкі, то першую вінакурню тут адкрыў у XIX стагоддзі мясцовы памешчык Акушка. З тых часоў вытворчасць практычна не спынялася, нягледзячы на войны і рэвалюцыі. Яшчэ нядаўна ў гістарычным будынку, выкладзеным з бутавага каменю, працаваў купажны цэх.
Каментары