Трамп сустрэўся ў Вашынгтоне з лідарам Сірыі аш-Шараа. Той увайшоў у Белы дом праз бакавыя дзверы
Прэзідэнт ЗША правёў сустрэчу ў Белым доме з часовым прэзідэнтам Сірыі Ахмедам аш-Шараа, за паімку якога як тэрарыста Вашынгтон яшчэ нядаўна абвяшчаў узнагароду $10 мільёнаў, пiша Бі-бі-сі.
«Прэзідэнт Сірыі прыбыў у Белы дом. Сустрэча паміж прэзідэнтам Трампам і прэзідэнтам аш-Шараа таксама пачалася», — аб'явіла прэс-служба Белага дома.
Пазней журналісты ўбачылі, як картэж аш-Шараа пакідае Белы дом. Якіх-небудзь сумесных заяў лідары дзвюх краін не рабілі.
Як адзначае агенцтва Reuters, прыбыццё аш-Шараа ў Белы дом выглядала больш сціпла, чым звычайна абстаўлены візіты іншых замежных лідараў. Ён увайшоў у Белы дом праз бакавы ўваход, а не праз галоўны ганак Заходняга крыла, дзе стаяць камеры і дзе замежных гасцей часта сустракае сам прэзідэнт. Пасля візіту ён выйшаў з Белага дома праз тыя ж дзверы.
Прыезд аш-Шараа ў Вашынгтон у прамым сэнсе слова гістарычны — ніводзін сірыйскі прэзідэнт раней не здзяйсняў афіцыйнага візіту ў ЗША.
Апошні раз высокапастаўлены сірыйскі чыноўнік наведваў Белы дом у снежні 1999 года. Тады гэта быў міністр замежных спраў Сірыі Фарук аш-Шараа, і ён удзельнічаў у мірных перамовах з Ізраілем.
За наступныя чвэрць стагоддзя краіна прайшла шлях ад кіравання Асадаў з грамадзянскай вайной, рэпрэсіямі і міжнароднай ізаляцыяй да падзення рэжыму.
Пасля захопу Дамаска сіламі «Хаят Тахрыр аш-Шам» і ўцёкаў Асада ў Маскву часовы лідар Сірыі і кіраўнік ХТШ Ахмед аш-Шараа спрабуе аднавіць адносіны з краінамі, якія доўгія гады пазбягалі кантактаў з Дамаскам.
Напярэдадні афіцыйнага візіту аш-Шараа ў Вашынгтон Рада бяспекі ААН выключыла яго, а таксама кіраўніка МУС краіны Анаса Хатаба са свайго санкцыйнага спісу. Шараа знаходзіўся пад санкцыямі ААН з 2014 года як член ХТШ, у мінулым — сірыйскага крыла «Аль-Каіды».
«З прыняццем гэтага дакумента Рада пасылае магутны палітычны сігнал, які прызнае, што Сірыя ўступае ў новую эпоху», — заявіў пасля галасавання пасол ЗША ў ААН Майк Уолтц.
Як пісала агенцтва Reuters, Вашынгтон некалькі месяцаў пераконваў астатнія 14 краін-членаў Рады бяспекі зняць санкцыі з аш-Шараа. Адпаведная рэзалюцыя была распрацавана і вынесена на галасаванне амерыканскімі дыпламатамі. У снежні ЗША адклікалі ўзнагароджанне ў $10 мільёнаў за садзейнічанне ў арышце аш-Шараа.
Вашынгтон, і перш за ўсё прэзідэнт Дональд Трамп, адкрыта падтрымліваюць былога джыхадзіста, які стаў лідарам краіны (хоць першапачаткова ў прэзідэнта ЗША была іншая рэакцыя на змену ўлады ў Сірыі).
«Малады, прывабны хлопец, моцны хлопец. Цвёрды характар, вельмі цвёрды — баец. У яго ёсць усе шанцы ўтрымаць сітуацыю пад кантролем», — казаў Дональд Трамп журналістам на борце Air Force One пасля першай кароткай сустрэчы з аш-Шараа ў маі ў Эр-Рыядзе.
Каментары