Ператрус у «Нашай Ніве» і яе рэдактара: шукалі відэа з Плошчы

Прыкладна ў 18.50 28 снежня ў дзверы Беларускага ПЭН-цэнтра, што месціцца на вуліцы Казлова, 7 у кватэры 101, пачалі грукаць невядомыя. Журналіст «Нашай Нівы» Зміцер Панкавец дзверы адмыкаць адмовіўся. У кватэры таксама быў Андрэй Расінскі. Тады налётчыкі вырубілі электрычнасць.

Відэа Аляксандра Васілеўскага, БелаПАН

Ператрус у ПЭН-Цэнтры пагражае часткова паралізаваць працу газеты «Наша Ніва», частка журналістаў якой працавала ў памяшканні ПЭНа.

На месца выехаў намеснік старшыні ПЭН-Цэнтра і рэдактар «Нашай Нівы» Андрэй Скурко.

Як вядома, раней гэбісты правялі ператрусы ў шэрагу партый, грамадскіх арганізацый і СМІ.

Варта адзначыць, што Уладзімір Някляеў у свой час узначальваў Беларускі ПЭН-Цэнтр. Гэта было да 2008 года. У часе ператрусаў у маі 2010-га памяшканне ПЭНа не чапалі.

Сачыце за развіццём падзей на сайце nn.by.

Невядомыя пагражаюць выламаць металічныя дзверы.

19.25

Зміцер Панкавец не адказвае на тэлефанаванні.

20.00

Як толькі прыехаў на месца галоўны рэдактар Андрэй Скурко, асобы ў цывільным вывелі яго і павезлі. Ён паспеў сказаць: «Да мяне дахаты».

20:12

Ператрус працягваецца, праўда, святло гарыць толькі ў адным галоўным пакоі, у Рэдакцыю нікога не пускаюць.

20.15

Каля Рэдакцыі збіраюцца людзі. Сярод іншых, прыехаў экс-кандыдат у прэзідэнты Аляксандр Мілінкевіч.

20:58

Да гэтага святло гарэла толькі у агульным пакоі, цяпер уключылася ў суседнім пакоі (мяркуючы па апісанні, у кабінеце рэдактара).

21:13

Да Скурко паехалі юрыст БАЖа Андрэй Бастунец і рэдактар «ARCHE» Валер Булгакаў, а таксама сябры.

21:18

У вокнах, якія выходзяць на двор (галоўны пакой і рэдактарскі) святло пагасла.

22:06

Бастунец і Булгакаў пад’ехалі да кватэры, дзе жыве рэдактар А.Скурко, але ім ніхто не адамкнуў. Разам з тым гарыць святло ў адным з вокнаў кватэры.

22:21

Як паведаміў Юрась Губарэвіч, выглядае на тое, што з офіса ПЭН-цэнтра, дзе размяшчаецца рэдакцыя «Нашай Нівы», рыхтуюцца вынесці аргтэхніку.

22:36

З ПЭН-цэнтра вынеслі тэхніку.

Са змесцівам рэдакцыйных камп’ютараў на месцы разбірацца не сталі — яны іх проста апісалі і загрузілі ў міліцэйскія машыны (Радыё Рацыя).

Па словах карэспандэнта радыё "Рацыі" Барыса Гарэцкага, лідар Руху «За свабоду» Аляксандр Мілінкевіч, які прыехаў пад вокны рэдакцыі, назваў дзеянні праваахоўных органаў незаконнымі. Дзеянні такія, па словах Мілінкевіча, шкодзяць іміджу Беларусі ў свеце.

22:47

У Андрэя Скурко працягваецца ператрус, сувязь з ім адключана, адключаны дамафон. Ператрус доўжыцца ўжо больш за дзве гадзіны.

23:45

У Скурко забралі камп’ютар, сышлі ў 23:35.

23:58

З Рэдакцыі «Нашай Нівы» і ПЭН-Цэнтра забралі 12 сістэмных блокаў камп'ютараў, 3 флэшкі, усе кампакт-дыскі. Журналістаў Панкаўца і Расінскага, якія былі там у момант налёту, не чапалі. Ператрус праводзілі два супрацоўнікі КДБ і два следчыя. Паводзілі сябе досыць карэктна.

Да самага канца ператрусу пад дзвярыма Рэдакцыі і ПЭНа адстаялі Аляксандр Мілінкевіч, Лявон Баршчэўскі і Аляксей Янукевіч. Рэдакцыя ўдзячная ім за гэтую маральную падтрымку.

Мяркуючы па тым, што канфіскоўваліся толькі носьбіты інфармацыі, гэбістаў цікавілі перадусім фота- і відэаматэрыялы з 19 снежня. Як вынікала з ордэраў на вобшук, ператрусы звязаныя з дзвюма крымінальнымі справах — аб масавых беспарадках і аб знявазе дзяржаўнай сімволікі (маецца на ўвазе, імаверна, эпізод з заменай чырвона-зялёнага сцяга на будынку КДБ на бел-чырвона-белы).

Нагадаем, што «Наша Ніва» яшчэ 20 снежня апублікавала фота- і відэаматэрыялы, а таксама аўдыёзапісы, якія раскрывалі механізм правакацыі падчас так званага «штурму» Дома ўрада. Магчыма, гэта і сталася адной з прычын ператрусу.

• 0
• 0
• 0
• 0
• 0
• 0
• 0
• 0